Як паведаміла нараўлянскае раённае выданьне «Прыпяцкая праўда», цяпер галасавы памочнік працуе і ў Нараўлянскім раёне Гомельскай вобласьці.
«Робат-асыстэнт умее распазнаваць маўленьне, адказваць на пастаўленыя пытаньні і аўтаматычна апрацоўваць тэкставыя паведамленьні. Ён працуе 24/7, таму нашыя абанэнты могуць атрымаць інфармацыю, якая іх цікавіць, у кожны час. Калі неабходная дадатковая дапамога, Алена перанакіруе званок ці паведамленьне ў кол-цэнтар, дзе больш падрабязна разабрацца ў сытуацыі дапаможа спэцыяліст», — сказаў намесьнік начальніка, галоўны інжынэр Нараўлянскага РГС Дзьмітры Аляксеенка.
Паводле яго, галасавы памочнік умее праводзіць аналіз дыялёгу, вылучаць зь яго ключавыя моманты, а таксама рэагаваць на эмацыйную афарбоўку звароту. Апроч таго, Алена можа адказаць і на пытаньні, у тым ліку пра запазычанасьць за спажываньне газу.
Выданьне паведаміла, што праграма выкарыстоўваецца ў тэставым рэжыме — адмыслоўцы аналізуюць запыты і на падставе гэтых зьвестак дапрацоўваюць ужо дзейныя функцыі галасавога памочніка. «У пэрспэктыве плянуецца расшырыць функцыянал галасавога памочніка і ўключыць у яго прыём заявак ад абанэнтаў», — адзначаецца ў публікацыі.
Сёлета ў красавіку разьвіцьцё штучнага інтэлекту ўключылі ў прыярытэтныя кірункі навуковай, навукова-тэхнічнай і інавацыйнай дзейнасьці ў Беларусі на 2026–2030 гады.
Форум