Расейская праваабарончая арганізацыя «ОВД-Инфо» паведаміла, што 21 сьнежня супрацоўнікі ФСБ затрымалі ў Горадні пецярбурскага актывіста Данііла Крынары. Мужчыну ставяць у віну артыкул аб супрацоўніцтве з замежнай дзяржавай (арт. 275.1 КК РФ) — па вэрсіі сьледзтва, з Украінай.
Справу будзе весьці маскоўскі сьледчы аддзел ФСБ. Яго даставілі ў Маскву.
Данііла ўжо затрымлівалі 24 верасьня ў Санкт-Пецярбургу — у гэты дзень паліцыя прыйшла зь ператрусамі да шэрагу мясцовых актывістаў і журналістаў у рамках крымінальнай справы аб «тэлефонным тэрарызьме». Пасьля двух дзён у ізалятары часовага ўтрыманьня яго выпусьцілі ў статусе падазраванага ў справе, паведамляла праваабаронцам ягоная жонка.
