«Украінцы перамаглі — і гэта надае нам мужнасьці, якой захапляецца сьвет. Амэрыканцы перамаглі — і таму вам удалося аб’яднаць сусьветную супольнасьць у абарону свабоды і міжнародных правілаў. Эўрапейцы перамаглі — таму Эўропа цяпер мацнейшая і больш незалежная, чым калі-небудзь у сваёй гісторыі», — сказаў Уладзімір Зяленскі.
Ён дадаў:
«Гэта мы павінны перамагчы Крэмль на полі бою. Гэта бітва ня толькі за зямлю, за тую ці іншую частку Эўропы. Гэта бітва ня толькі за жыцьцё, свабоду і бясьпеку людзей — украінцаў ці любога іншага народу, які Расея імкнецца заваяваць. Гэта бітва за тое, у якім сьвеце будуць жыць нашы дзеці і ўнукі, іх дзеці і ўнукі. Гэтую бітву нельга ні замарозіць, ні адкласьці. Гэта нельга ігнараваць у надзеі, што акіян ці нешта яшчэ абароніць цябе».
У наступным годзе, па словах Зяленскага, прыйдзе час, калі «мужнасьць Украіны і рашучасьць амэрыканцаў забясьпечаць свабоду людзям, якія адстойваюць свае каштоўнасьці».
Гаворачы аб адным з самых гарачых пунктаў Данбасу, Бахмуце, прэзыдэнт Украіны заявіў, што «ўкраінскі Данбас стаіць».
«Расейская армія выкарыстоўвае ўсё, што можа, супраць Бахмута і іншых нашых гарадоў на лініі фронту. Вельмі адчувальная перавага акупантаў у артылерыі. У іх снарадаў у разы больш, чым у нас. Яны выкарыстоўваюць у разы больш ракет і самалётаў, чым калі-небудзь было ў нас. Але нашы сілы абароны стаяць», — падкрэсьліў Зяленскі.
Прэзыдэнт зьвярнуўся да Кангрэсу і амэрыканскага народу:
«Нам патрэбна вашая дапамога, каб ня проста выстаяць у такіх бітвах, але каб пераламіць іх. Перамагаць на полі бою».
Зяленскі таксама нагадаў пра выкарыстаньне расейскай арміяй іранскіх бесьпілётнікаў, якія запускаюцца з тэрыторыі Расеі «сотнямі і сталі пагрозай нашай крытычнай інфраструктуры».
«Так адзін тэрарыст знаходзіць другога. Каб ваяваць супраць вольнага сьвету», — сказаў Зяленскі.
Ён заклікаў ЗША ўзмацніць санкцыі, каб даць Расеі адчуць, наколькі разбуральная яе агрэсія:
«У вашых сілах дапамагчы нам прыцягнуць да адказнасьці ўсіх тых, хто разьвязаў гэтую несправакаваную і незаконную вайну».
Падзякаваўшы амэрыканцам за вайсковую дапамогу, Зяленскі зьвярнуўся да Кангрэсу: «Вы далі нам артылерыю, але гэтага недастаткова». Ён запэўніў прысутных, што ўкраінскія вайскоўцы здольныя авалодаць амэрыканскай тэхнікай, у прыватнасьці кіраваць амэрыканскімі танкамі і самалётамі.
«Праз два дні будзем сьвяткаваць Каляды. Можа, пры сьвечках. Не таму, што гэта больш сэнтымэнтальна. А таму, што ня будзе сьвятла. Зараз у выніку расейскіх удараў больш за 10 млн чалавек ва Ўкраіне засталіся безь сьвятла... Мы пройдзем сваю вайну за незалежнасьць. Мы сустрэнем гэтае Раство — і, калі ня будзе электрычнасьці, усё роўна ня згасьне сьвятло нашай веры ў саміх сябе», — сказаў прэзыдэнт Украіны.
У канцы выступу Ўладзімір Зяленскі перадаў сьпікеру Палаты прадстаўнікоў Нэнсі Пэлосі (зь якой у яго адбылася сустрэча перад выступам) украінскі сьцяг з аўтографамі, які папрасілі перадаць абаронцы Бахмута. Са свайго боку Зяленскаму падарылі амэрыканскі сьцяг, зьняты з Капітолія.
Перад выступам у Кангрэсе прэзыдэнт Украіны правёў у Белым доме перамовы з прэзыдэнтам ЗША Джо Байдэнам. Байдэн, у прыватнасьці, анансаваў прадастаўленьне Ўкраіне новага пакету вайсковай дапамогі на 1,85 млрд даляраў.
Вашынгтон упершыню перадае Ўкраіне батарэю ЗРК Patriot і боепрыпасы да яе. Агулам ЗША выдзелілі Ўкраіне прыкладна 21,2 мільярда даляраў з пачатку поўнамаштабнага ўварваньня Расеі 24 лютага.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
