Паводле Зяленскага, 1 сьнежня на пасяджэньні РНБА разгледзелі шматлікія факты сувязей «асобных рэлігійных колаў ва Ўкраіне зь дзяржавай-агрэсарам».
«На жаль, нават расейскі тэрор і поўнамаштабная вайна не пераканалі некаторых дзеячаў у тым, што трэба пераадолець спакусу зла. Што ж, мы павінны стварыць такія ўмовы, калі любыя залежныя ад дзяржавы-агрэсара дзеячы ня будуць мець ніякай магчымасьці маніпуляваць украінцамі і аслабляць Украіну знутры», — адзначыў Зяленскі.
Прэзыдэнт Украіны заявіў, што Рада нацыянальнай бясьпекі і абароны (РНБА) даручыла ўраду ўнесьці на разгляд Вярхоўнай Рады законапраект, якім выключалася б дзейнасьць рэлігійных арганізацый, афіляваных з цэнтрамі ўплыву ў Расейскай Фэдэрацыі.
Дзяржаўная служба па этнічнай палітыцы і свабодзе сумленьня правядзе экспэртызы статуту УПЦ у частцы яе ўзаемаадносін з Маскоўскім патрыярхатам.
Акрамя таго, Кіева-Пячэрскую ляўру правераць на выкарыстаньне рэлігійнымі арганізацыямі яе маёмасьці. А супраць сьвятароў, якія супрацоўнічаюць з Расеяй, увядуць санкцыі, іх прозьвішчы Зяленскі паабяцаў абнародаваць неўзабаве.
«Гэтымі і іншымі рашэньнямі мы гарантуем Украіне духоўную незалежнасьць», — заявіў Зяленскі.
На працягу апошніх тыдняў Служба бясьпекі Ўкраіны правяла ператрусы ў больш чым 350 царкоўных будынкаў на тэрыторыях Сьвята-Ўсьпенскай Кіева-Пячэрскай ляўры ў Кіеве, Карэцкага Сьвята-Траецкага манастыра і памяшканьнях Сарненска-Палескай япархіі УПЦ у Ровенскай вобласьці.
Сілавікі праверылі 850 чалавек, больш за 50 зь іх «прайшлі паглыбленыя контравыведніцкія апытаньні, у тым ліку з выкарыстаньнем паліграфа». У памяшканьнях яны знайшлі прарасейскую літаратуру для навучаньня ў сэмінарыі і парафіяльных школах, «у тым ліку для прапаганды „русского мира“», а таксама больш за 2 млн грыўняў гатоўкай ($ 53, 8 тысячы), больш за 100 тысяч даляраў і некалькі тысяч расейскіх рублёў, сьцьвярджаюць у СБУ.
У Кіеве 27 траўня адбыўся Памесны сабор Украінскай праваслаўнай царквы Маскоўскага патрыярхату, які вырашыў цалкам адмовіцца ад РПЦ. Са статуту рэлігійнай арганізацыі прыбралі ўсе згадкі пра Расейскую праваслаўную царкву, пры гэтым аб выхадзе з РПЦ так і не заявілі.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
