«Стэлы Антокальскіх могілак не абрынуцца так выразна, як (абрынуўся) нядаўна самы вялікі савецкі помнік у Рызе. Як і плянавалася, стэлы будуць здымацца арганізавана, асобнымі сэгмэнтамі, і гэта можа заняць да трох тыдняў», — цытуе словы мэра Вільні Рэмігіюса Шымашуса Delfi.
«На жаль, гэтыя работы прыйшлося адкласьці праз рашэньне Камітэту правоў чалавека ААН, але дзень старту ўжо настаў», — дадаў палітык.
Раней паведамлялася, што скульптуры ўдасца дэмантаваць на гэтым тыдні, піша Delfi. У мінулы аўторак Міністэрства юстыцыі Літвы паведаміла, што Камітэт правоў чалавека ААН пакінуў у сіле часовую ахову скульптур, якія знаходзяцца на Антокальскіх могілках у сталіцы, тым самым фармальна перашкаджаючы іх дэмантажу сталічнымі ўладамі.
Аб часовых мерах Камітэт прасілі заяўнікі, якія прадставіліся «этнічнымі расейцамі», у тым ліку Дзьмітрый Глазкоў, Тацьцяна Брант, Анастасія Брант і Казімерас Юрайціс.
Пры гэтым вядома, што Юрайціс пасьля 2020 году выступаў у падтрымку Аляксандра Лукашэнкі і езьдзіў у Беларусь сустракацца з прадстаўнікамі ўлады. Аўтары скаргі ўказалі, што рашэньне аб зносе помніка ўшчамляе правы расейскай нацыянальнай меншасьці і права на павагу прыватнага і сямейнага жыцьця.
Нягледзячы на рашэньне камітэту ААН, улады Літвы прынялі рашэньне дэмантаваць скульптуры. Міністэрства юстыцыі і мэрыя сьцьвярджаюць, што Камітэт быў уведзены ў зман довадамі згаданых асобаў аб тым, што помнік будзе апаганены, а парэшткі, якія знаходзяцца побач, — перапахаваныя.
