Пра гэта паведамляе Reuters, спасылаючыся на крыніцу ў NATO.
Раней, падчас саміту G20 на востраве Балі ў Інданэзіі, Байдэн спаслаўшыся на папярэднюю інфармацыю, сказаў, што ракета, імаверна, была выпушчаная не «з Расеі».
Брытанскі прэм’ер: «Нічога б не адбылося, каб не ўварваньне Расеі ва Ўкраіну»
Прэм’ер-міністар Вялікай Брытаніі Рышы Сунак заявіў, што сьмяротны ракетны ўдар у Польшчы падкрэсьліў неад’емную пагрозу, якую нясе вайна, але не сказаў, хто выпусьціў снарад, піша AFP.
Выступаючы пасьля саміту G20 на Балі ў Інданэзіі, Сунак сказаў, што «нічога з гэтага не адбылося б, каб не ўварваньне Расеі ва Ўкраіну. Гэта жорсткая і няўмольная рэальнасьць пуцінскай вайны».
Сутыкнуўшыся з пэрспэктывай таго, што вайна перакідваецца па-за межы Ўкраіны на тэрыторыю NATO, Сунак сказаў, што ўдар, у выніку якога загінулі два чалавекі, не адбыўся б, калі б Расея не абстраляла Ўкраіну ракетамі.
«Пакуль гэта будзе працягвацца, гэта нясе пагрозу для нашай бясьпекі і бясьпекі нашых хаўрусьнікаў. І пакуль гэта будзе працягвацца, гэта будзе надалей разбураць сусьветную эканоміку», — сказаў ён.
Сунак таксама зьвязаў эканамічны застой у сваёй краіне, а таксама 11-працэнтную інфляцыю з вайной ва Ўкраіне.
«Няма ніводнага чалавека ў сьвеце, які не адчуў бы на сабе ўплыў пуцінскай вайны», — сказаў ён.
Дарадца Офісу Зяленскага: Толькі Расея сваімі ракетнымі нападамі вінаватая ў пагрозах і эксцэсах у іншых краінах
Дарадца кіраўніка офісу ўкраінскага прэзыдэнта Міхайла Падаляк лічыць, што адказнасьць за здарэньне ў Польшчы ў кожным выпадку нясе Масква, піша BBC.
«Намер, сродкі выкананьня, рызыкі, эскаляцыя — усё гэта толькі Расея. І тут ня можа быць ніякіх іншых тлумачэньняў любым эксцэсам з ракетамі. Бо калі краіна-агрэсар наносіць наўмысны канцэнтраваны ракетны ўдар па ўсёй тэрыторыі вялікай краіны на эўрапейскім кантынэнце сваёю састарэлаю савецкаю зброяй (ракеты клясы Х), трагедыя рана ці позна адбываецца і на тэрыторыях іншых дзяржаваў.
Ня бачу ані найменшага сэнсу адыходзіць ад гэтай простай лёгікі: толькі Расея сваімі ракетнымі нападамі вінаватая ў пагрозах і эксцэсах у іншых краінах».
Падаляк заклікаў заходнія дзяржавы нарэшце «закрыць неба» над Украінай.
«Ня трэба шукаць апраўданьняў і адкладаць ключавыя рашэньні. Эўропе пара закрыць неба над Украінай. У тым ліку і для яе ўласнай бясьпекі».
Рэакцыя Польшчы
Прэзыдэнт Польшчы Анджэй Дуда пракамэнтаваў інцыдэнт з ракетай, якая ўпала каля польска-ўкраінскай мяжы і забіла дваіх чалавек.
«Хутчэй за ўсё, гэта была ракета С-300 расейскай вытворчасьці. У нас на гэты момант няма доказаў таго, што гэта была ракета, запушчаная расейскім бокам», — заявіў Дуда.
Паводле яго, ёсьць шмат прыкметаў таго, што гэта была ракета супрацьпаветранай абароны, якая, на жаль, упала на тэрыторыі Польшчы.
Прэм’ер-міністар Польшчы Матэвуш Маравецкі прызнаў, што, магчыма, цяпер няма падставаў настойваць на запуску працэдуры NATO паводле пункту № 4. Польскага прэм’ера цытуе Reuters.
Што кажуць у Расеі
Міністэрства абароны Расеі зьняпраўдзіла ўсе паведамленьні ўкраінскага боку аб пашкоджаных жылых будынках у Кіеве і аб расейскай прыналежнасьці ракеты, у выніку выбуху якой у Польшчы загінулі два чалавекі.
«Усе разбурэньні, якія дэманструе кіеўскі рэжым у жылых кварталах украінскай сталіцы, ёсьць простым наступствам падзеньня і самаліквідацыі запушчаных украінскімі войскамі зэнітных ракет з разьмешчаных у межах гораду ўкраінскіх і замежных комплексаў супрацьпаветранай абароны», — працытавала расейскае агенцтва «РИА Новости» пазыцыю расейскага вайсковага ведамства.
У міністэрстве абароны Расеі таксама пераконваюць, што і ракета, што выбухнула ў Польшчы, «адназначна ідэнтыфікаваная расейскімі спэцыялістамі абаронна-прамысловага комплексу як элемэнты зэнітнай кіраванай ракеты С-300 Паветраных сіл Украіны».
- Як паведамлялі раней, на тэрыторыі Польшчы ў мясцовасьці Пшэводаў, непадалёк ад мяжы з Украінай, у аўторак адбыўся выбух. Улады пацьвердзілі падзеньне ракеты і паведамілі, што загінулі два чалавекі.
- Польшча выклікала амбасадара Расеі ў Варшаве для тлумачэньняў пасьля таго, як Масква зьняпраўдзіла паведамленьні аб сваёй датычнасьці да выбуху ў Пшэводаве.
