У публікацыі «Я прэзыдэнт-элект Беларусі, і разам мы пераможам» Ціханоўская тлумачыць заходняй аўдыторыі сытуацыю ў Беларусі і маштаб рэпрэсіяў супраць грамадзянскай супольнасьці.
«Захад павінен перастаць успрымаць Лукашэнку як прэзыдэнта. Ён незаконна захапіў уладу і павінен быць прыцягнуты да адказнасьці». — піша Ціханоўская.
Паводле яе, Лукашэнка ўнутры краіны вельмі непапулярны, яго падтрымліваюць ня больш за 25 працэнтаў насельніцтва, у асноўным пэнсіянэры, прарасейскія чыноўнікі і супрацоўнікі спэцслужбаў.
«Я перамагла Лукашэнку на ўсеагульных выбарах 2020 году, пакуль ён ня скраў перамогу з дапамогай КДБ, сілавікоў і Пуціна», — працягвае Ціханоўская.
Палітык нагадала, што на мінулым тыдні Рада Эўропы «зрабіла беспрэцэдэнтны крок, фармалізаваўшы супрацоўніцтва з дэмакратычнымі сіламі Беларусі і адхіліўшы прадстаўнікоў рэжыму».
«Гэта добрая мадэль для іншых міжнародных арганізацыяў — працы з часткамі беларускага грамадзтва, зьвязанымі з Эўропай і Ўкраінай. У жніўні я таксама стварыла Аб’яднаны пераходны кабінэт міністраў Беларусі, каб абʼяднаць асноўныя палітычныя групы. Мы вырашылі не чакаць, пакуль абрынуцца рэжымы Лукашэнкі ці Пуціна, а падрыхтаваць Беларусь загадзя. І гэты кабінэт будзе працаваць як пераходны ўрад да новых выбараў. Я прэзыдэнт-элект Беларусі. Я змагаюся за сваю краіну ў выгнаньні», — напісала Ціханоўская.
Раней палітык прытрымлівалася нэўтральных фармулёвак, кажучы пра свой статус, і адмаўлялася праводзіць інаўгурацыю. Яна называла сябе пераважна нацыянальнай лідэркай Беларусі. Прэзыдэнтам-электам або выбраным прэзыдэнтам называюць палітыка, які перамог у прэзыдэнцкіх выбарах, але не ўступіў афіцыйна на пасаду.
Паводле ЦВК Беларусі, на выбарах 2020 году Аляксандар Лукашэнка набраў 80,1% галасоў, а Сьвятлана Ціханоўская — 10,1%. Незалежныя назіральнікі заявілі ў жніўні пра шматлікія фальсыфікацыі, якія не дазваляюць прызнаць выбары адкрытымі і дэмакратычнымі. Плятформа «Голас», дзе зарэгістраваліся больш як 1,24 млн чалавек, пасьля праверкі 500 тысяч сфатаграфаваных бюлетэняў абвясьціла, што знайшла амаль 300 выбарчых участкаў, дзе вынікі галасаваньня сфальсыфікавалі. На многіх участках, дзе за падлікам сачылі назіральнікі, Ціханоўская значна абагнала Лукашэнку.
Хто такая Сьвятлана Ціханоўская
Сьвятлана Ціханоўская — беларускі палітык, былая кандыдатка ў прэзыдэнты Беларусі. Цяпер знаходзіцца ў Літве.
- Сьвятлана Ціханоўская нарадзілася ў 1982 годзе ў Мікашэвічах (Берасьцейская вобласьць).
- 15 траўня 2020 году пасьля адмовы Цэнтральнай выбарчай камісіі зарэгістраваць мужа Сьвятланы, зьняволенага лідэра кампаніі «Страна для жизни» блогера Сяргея Ціханоўскага, Сьвятлана ад свайго імя падала дакумэнты на рэгістрацыю ініцыятыўнай групы. 20 траўня яе групу зарэгістравалі. 29 траўня кіраўніка яе выбарчага штабу Сяргея арыштавалі зноў.
- Кандыдаткай у прэзыдэнты Ціханоўскую зарэгістравалі 14 ліпеня 2020.
- Пасьля арышту прэтэндэнта на пасаду прэзыдэнта Віктара Бабарыкі і ўцёкаў за мяжу яшчэ аднаго прэтэндэнта Валера Цапкалы іх штабы аб’ядналіся з штабам Сьвятланы Ціханоўскай. Аб’яднаны штаб правёў пасьпяховую выбарчую кампанію з шматтысячнымі мітынгамі ў вялікіх і малых гарадах Беларусі пад бел-чырвона-белымі сьцягамі.
- Паводле афіцыйных зьвестак ЦВК, на выбарах Сьвятлана Ціханоўская набрала 10,09%, а Аляксандар Лукашэнка — 80,08%. Ціханоўская адмовілася прызнаць гэтыя вынікі і 10 жніўня асабіста накіравалася ў ЦВК, каб іх абскардзіць.
- З ЦВК палітык не вярнулася. Сувязь зь ёю зьнікла, празь некалькі гадзін у вэстыбюлі ЦВК яна паведаміла, што «прыняла рашэньне» і зьехала ў невядомым кірунку. 11 жніўня стала вядома, што яна ў Літве. Былі апублікаваныя два відэазвароты Ціханоўскай, адзін зь якіх быў запісаны ў ЦВК пасьля размовы з двума высокапастаўленымі сілавікамі, у ім Ціханоўская заклікае дэманстрантаў не выходзіць на вуліцы. Кіраўніцтва Літвы 11 жніўня заявіла, што звароты Ціханоўская запісала пад ціскам і шантажом.
- Празь некалькі дзён пасьля фактычнай «дэпартацыі» ў Літву Сьвятлана Ціханоўская заявіла, што бярэ на сябе ролю «нацыянальнага лідэра».
- 18 жніўня з ініцыятывы Сьвятланы Ціханоўскай у Беларусі была створаная Каардынацыйная рада для транзыту ўлады.
- 10 верасьня 2020 Сэйм Літвы прагаласаваў за прызнаньне Сьвятланы Ціханоўскай абраным кіраўніком Беларусі.
- Ад верасьня 2020 году Ціханоўская наведала з працоўнымі візытамі дзясяткі краін сьвету і сустрэлася зь іх лідэрамі. Сярод іх прэзыдэнт Францыі Эманюэль Макрон, канцлер Нямеччыны Ангела Мэркель, высокі прадстаўнік ЭЗ Жузэп Бурэль, прэзыдэнт ЗША Джо Байдэн ды інш.
- Сьвятлана Ціханоўская кантактавала з актыўнымі людзьмі ў Беларусі падчас пратэстаў 2020 і 2021 гадоў, прызначыла сваіх прадстаўнікоў для падтрыманьня лучнасьці з сацыяльнымі і прафэсійнымі групамі ў краіне.
- Ціханоўская выступіла за правядзеньне ў Беларусі новых празрыстых прэзыдэнцкіх выбараў пры міжнародным кантролі і актыўна заклікала міжнародную супольнасьць да ўдзелу ў арганізацыі перамоваў зь цяперашнім кіраўніцтвам Беларусі.
- За два гады Ціханоўская, яе штаб і зьвязаныя з ёй ініцыятывы дапамагалі палітвязьням, выступалі з шэрагам гуманітарных і палітычных ініцыятываў.
- Яна выступала супраць сфальшаванага канстытуцыйнага рэфэрэндуму, ініцыяванага Лукашэнкам у 2022 годзе.
- У лютым 2022 Ціханоўская асудзіла расейскую агрэсію супраць Украіны і саўдзел у ёй рэжыму А. Лукашэнкі, у сакавіку 2022 году стварыла беларускі Антываенны рух.
- У красавіку 2022 году Ціханоўская на канфэрэнцыі Рады Бясьпекі ААН заявіла, што «поўдзень Беларусі фактычна знаходзіцца пад расейскай акупацыяй».
- Ціханоўская правяла пасьпяховыя перамовы з урадам Польшчы і дамаглася асаблівых умоваў для прыезду і легалізацыі беларусаў, ня згодных з рэжымам Лукашэнкі.
- У жніўні 2022 году Сьвятлана Ціханоўская стварыла Аб’яднаны пераходны кабінэт, назвала чатырох сваіх прадстаўнікоў.
- У лістападзе 2022 Ціханоўская ўпершыню назвала сябе прэзыдэнтам-электам
