Рашэньне аб пачатку будовы агароджы на польска-расейскай мяжы абвясьціў 2 лістапада міністар нацыянальнай абароны Польшчы Марыюш Блашчак.
«Сёньня пачнуцца працы сапёраў, што зьяўляецца пачаткам будаўніцтва часовай агароджы на мяжы з Калінінградзкай вобласьцю», — дадаў ён.
Марыюш Блашчак зазначыў, што такія захады прадпрынятыя ў сувязі з патрэбай узмацніць бясьпеку на мяжы.
Паводле міністра абароны, агароджа будзе складацца з трох столак калючага дроту шырынёй тры мэтры і вышынёй два з паловай мэтры.
«Таксама будуць праводзіцца работы з забесьпячэньнем пэрымэтра, гэта значыць прылад, якія забясьпечаць электронны кантроль мяжы з Калінінградзкай вобласьцю», — сказаў ён.
Летам 2021 году Польшча на фоне росту патоку мігрантаў зь Беларусі спачатку ўзьвяла часовую драцяную загароду. А ў 2022-м на польска-беларускай мяжы быў пабудаваны 180-кілямэтровы плот.
