Беспрэцэдэнтныя санкцыі і меры экспартнага кантролю, уведзеныя Злучанымі Штатамі і саюзьнікамі ў дачыненьні да Расеі з пачатку вайны супраць Украіны, выконваюць сваю функцыю, ускладаючы на Маскву адказнасьць за ваенную агрэсію, заявілі 20 кастрычніка ў Дзярждэпартамэнце ЗША.
У заяве Дзярждэпартамэнту гаворыцца, што «санкцыі і экспартны кантроль маюць сур’ёзныя і доўгатэрміновыя наступствы для расейскай абаронна-прамысловай базы».
Прынятыя Захадам меры ўжо прывялі да дэградацыі здольнасьцяў расейскай зброевай прамысловасьці вырабляць і назапашваць узбраеньне ўзамен зьнішчанага ў час вайны, падкрэсьлілі ў Дзярждэпартамэнце, дадаўшы, што сурʼёзны недахоп забесьпячэньня вымушае Расею зьвяртацца да менш тэхналягічна разьвітых краін, такіх як Іран і Паўночная Карэя па зброю і боепрыпасы.
Ад экспартнага кантролю пацярпела расейская вайсковая авіяцыйная праграма, якая страціла доступ да дэталяў самалётаў, а расейская вытворчасьць гіпэргукавых балістычных ракет практычна спынілася праз адсутнасьць неабходных паўправаднікоў, якія выкарыстоўваюцца ў вытворчым працэсе.
Па дадзеных расейскіх СМІ, вытворчасьць вайсковых самалётаў далёкага радыёлякацыйнага выяўленьня і кіраваньні новага пакаленьня спынена праз адсутнасьць замежных камплектных частак, з гэтай жа прычыны былі закрытыя заводы, якія вырабляюць ракеты клясы зямля — паветра.
«Расея вярнулася да абаронных запасаў савецкіх часоў, паколькі нашыя меры пазбавілі расейскія кампаніі магчымасьці папаўняць унутраныя ланцужкі паставак», — гаворыцца ў заяве.
Пачынаючы зь лютага 2022 году, урад ЗША ўвёў забарону на ўвесь экспарт, рээкспарт і перадачу прадукцыі, якая падпадае пад дзеяньне Правілаў экспартнага кантролю, для ваеннага выкарыстаньня або канчатковых карыстальнікаў у Расейскай Фэдэрацыі і Беларусі.
Пад кіраўніцтвам ЗША сфармавана кааліцыя з 37 краін, якая ўзмацніла ўплыў амэрыканскіх дзеяньняў, ужыўшы да Расеі меры кантролю, практычна аналягічныя тым, якія былі ўведзены Злучанымі Штатамі. Гэтая глябальная кааліцыя падмацоўвае намаганьні ЗША ў ізаляцыі Расеі ад тавараў, тэхналёгій і праграмнага забесьпячэньня, неабходных Уладзіміру Пуціну для вядзеньня вайны супраць Украіны.
Фінансавыя санкцыі, уведзеныя ЗША, таксама аказваюць значны ўплыў на здольнасьць Масквы працягваць вайну, нагадалі ў Дзярждэпартамэнце.
Санкцыі спынілі рух актываў расейскага Цэнтральнага банку на суму каля 300 мільярдаў даляраў, што абмежавала здольнасьць ЦБ дапамагаць вайсковай галіне і зьмякчаць наступствы санкцый. Расейскія алігархі і фінансавыя ўстановы, якія трапілі пад санкцыі, былі вымушаны пазбаўляцца ад доўгатэрміновых актываў за межамі Расеі. Больш за тое, санкцыі заахвоцілі банкі шэрагу краін згарнуць сувязі з расейскім фінансавым сэктарам. Нягледзячы на выгаду ад высокіх цэн на энэрганосьбіты, МВФ па-ранейшаму чакае, што сёлета эканоміка Расеі скароціцца больш як на 3 працэнты. Упушчаныя інвэстыцыі, экспартны кантроль і абмежаваньні, якія накладаюцца на рэальную расейскую эканоміку, затармозяць пэрспэктывы на доўгія гады.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
