Журналіст і адзін зь лідэраў Саюзу палякаў Беларусі Анджэй Пачобут застаецца за кратамі ўжо 1,5 года, неўзабаве над ім пройдзе суд.
Разглядаць так званую «польскую справу», у межах якой вінавацяць палітзьняволенага, імаверна, будуць у Горадні.
Учора стала вядома, што Анджэя Пачобута дадалі ў «тэрарыстычны спіс». На гэтую навіну імгненна адрэагавалі калегі журналіста з польскага выданьня Gazeta Wyborczа, супрацоўнікам якой цягам многіх гадоў ёсьць Пачобут.
«Я быў ашаломлены, даведаўшыся пра чарговыя рэпрэсіі, якія абрынулася на нашага калегу Анджэя Пачобута з боку беларускага рэжыму, — напісаў намесьнік галоўнага рэдактара Gazeta Wyborczа Барташ Веліньскі. — За амаль 600 дзён зьняволеньня Анджэй прайшоў празь пяць беларускіх турмаў. Каб яго зламаць, трымалі яго ў тым самым месцы, дзе асуджаныя на сьмяротнае пакараньне правялі апошнія дні жыцьця. Ён не зламаўся, не прызнаў сябе вінаватым і не прасіў у дыктатара Аляксандра Лукашэнкі літасьці і дазволу выехаць у Польшчу».
Веліньскі адзначае, што празь нязьменную пазыцыю Анджэя Пачобута рэжым выставіў супраць яго новыя абвінавачаньні і ўнёс яго ў сьпіс «тэрарыстаў».
«Анджэй тэрарыст? Лукашэнка і ягоныя паплечнікі не ўсьведамляюць, наколькі яны нікчэмныя. Анджэй гэта хадзячая прыязнасьць і дабрыня. Памятаю, як ён зайшоў у рэдакцыю і зьзяў. Чалавек, які прыехаў з паняволенай краіны, здаваўся больш аптымістычным, чым мы, якія жывуць у свабоднай дзяржаве. Адзінай зброяй, якую выкарыстоўваў Пачобут, была асадка. І, пэўна, таму рэжым лічыў яе сьмерцяноснай. Як доказ віны ён выкарыстоўвае артыкулы, апублікаваныя Анджэем у Gazecie Wyborczej.
Працэс над ім хутка пачнецца ў судзе ў Горадні. Не сумняваюся, што прысуд будзе драконаўскім. У перададзеным кантрабандай з турмы жарце Анджэй напісаў, што з спакойным сумленьнем адправіцца ў лягер. Мы не забудзем пра Анджэя, не здамося. Будзем увесь час патрабаваць вызваленьня Анджэя Пачобута і іншых палітвязьняў беларускага рэжыму», — напісаў Барташ Веліньскі.
Хто такі Анджэй Пачобут
- Анджэй Пачобут — вядомы журналіст і грамадзкі дзеяч, сябра незарэгістраванага Саюзу палякаў Беларусі.
- Нарадзіўся 17 красавіка 1973 году ў Вялікай Бераставіцы (Горадзенская вобласьць). Яму 49 гадоў. Жыве ў Горадні. Жанаты, двое дзяцей: старэйшая дачка вучыцца ў Горадні ў мэдычным унівэрсытэце, малодшы сын ходзіць у школу.
- У 2002 годзе прыйшоў у журналістыку. Працаваў у першых незалежных горадзенскіх газэтах «Пагоня», «Дзень», «Мясцовы час», рэспубліканскай газэце «Народная воля», газэце СПБ на польскай мове Głos znad Niemna («Голас з-над Нёману»). Быў рэдактарам часопіса СПБ Magazyn Polski na uchodźstwie, карэспандэнтам буйнога польскага выданьня Gazeta Wyborcza. Займаўся тэмамі, зьвязанымі з гісторый спэцслужбаў СССР, антысавецкага супраціву ў Заходняй Беларусі, Арміяй Краёвай.
- 25 сакавіка 2021 году Андрэя Пачобута затрымалі, прыйшоўшы да яго зь ператрусам.
- Трох фігурантак «польскай справы» Ірэну Бярнацкую, Марыю Цішкоўскую і Ганну Панішаву у траўні 2021 вызвалілі ўзамен на выезд зь Беларусі. Пачобут адмовіўся ад такой прапановы. Старшыню Анжаліку Борыс у сакавіку 2022 вызвалілі зь СІЗА пад хатні арышт.
- У Анджэя хворае сэрца. Раней, асабліва ў сьпёку, у яго часта здараліся прыступы, ён слабеў, клаўся ў шпіталь праз парушаны рытм сэрца.
- За артыкул пра напад СССР на Польшчу ў верасьні 1939-га Анджэя Пачобута абвінавацілі ў «распальваньні варожасьці па нацыянальнай прыкмеце». У публікацыі Пачобут назваў напад СССР на Польшчу 17 верасьня 1939 году агрэсіяй. Таксама ў матэрыялах крымінальнай справы фігуравалі заявы журналіста ў абарону польскай меншасьці ў Беларусі, артыкул пра здушэньне беларускіх пратэстаў у 2020 годзе і тэкст 2006 году пра аднаго з камандзіраў польскага антыкамуністычнага падпольля на Горадзеншчыне.
- У 2023-м Пачобуту вынесьлі прысуд — 8 гадоў калёніі. 21 чэрвеня стала вядома, што палітвязьня перавялі ў наваполацкую калёнію № 1.
