Дапаможам Украіне вярнуць анэксаваныя тэрыторыі, — Джо Байдэн
Прэзыдэнт ЗША Джо Байдэн у адмысловай заяве пасьля анэксіі Крамлём чатырох украінскіх рэгіёнаў адзначыў:
«Злучаныя Штаты заўсёды будуць паважаць міжнародна прызнаныя межы Ўкраіны. Мы працягнем падтрымліваць намаганьні Ўкраіны для вяртаньня кантролю над сваёй тэрыторыяй».
Ён запэўніў, што ЗША будуць працягваць пастаўкі Ўкраіне неабходнага ўзбраеньня, а Кангрэс прыме закон аб выдзяленьні яшчэ $12 млрд на падтрымку Кіева.
Новыя санкцыі Вашынгтону
Адміністрацыя прэзыдэнта Джо Байдэна абвясьціла пра новыя эканамічныя санкцыі супраць сотняў расейскіх чыноўнікаў у адказ на анэксію Крамлём чатырох рэгіёнаў Украіны.
Пад санкцыямі апынуцца падстаўныя кампаніі, створаныя адмыслова для ўхіленьня ад ранейшых санкцый у дачыненьні да расейскіх вайсковых пастаўнікоў. Міністэрства фінансаў ЗША ў гэтым кантэксьце назвала 14 міжнародных пастаўшчыкоў, якія спрыялі расейскім вайсковым пастаўкам.
У санкцыйны сьпіс дадалі Эльвіру Набіуліну, кіраўніцу цэнтральнага банку Расеі і былую дарадцу Пуціна.
Будуць таксама пашыраныя папярэднія санкцыі ў дачыненьні да вышэйшых чыноўнікаў Крамля, якія ўключаць іх жонак і дзяцей. Сярод гэтых сямейнікаў — жонка прэм’ер-міністра Расеі Міхаіла Мішусьціна і двое іхных дарослых дзяцей, а таксама жонка і дарослыя дзеці міністра абароны Сяргея Шайгу.
У новы пакет санкцый ЗША трапіла беларускае прадпрыемства «СьветлагорскХімвалакно» (Сохім), якое забясьпечвае пастаўкі тэкстылю і валакна для абароннай прамысловасьці Расеі, адзначаецца ў санкцыйным сьпісе Міністэрства фінансаў ЗША.
Заява Рады Эўропы
Рада Эўропы выступіла з асуджэньнем анэксіі Расеяй украінскай тэрыторыі.
«Гвалтоўная зьмена міжнародных межаў за кошт іншай сувэрэннай дзяржавы, — гаворыцца ў заяве Рады, — і папярэднія так званыя „рэфэрэндумы“ ўяўляюць сабой сур’ёзнае парушэньне міжнароднага права і ня могуць быць прызнаныя.
Як краіна-акупант Расея працягвае несьці поўную адказнасьць за захаваньне правоў чалавека на адпаведных тэрыторыях, а таксама ў акупаваным Крыме.
Расея павінна неадкладна дээскаляваць сытуацыю і вярнуцца да прынцыпаў міжнароднага права, якія застаюцца краевугольным каменем міру ў Эўропе і за яе межамі».
Таксама ў заяве гаворыцца, што «Рада Эўропы будзе працягваць падтрымліваць народ і ўлады нашай дзяржавы-сябра Ўкраіны. Наша прыхільнасьць незалежнасьці, сувэрэнітэту і тэрытарыяльнай цэласнасьці Ўкраіны ў яе міжнародна прызнаных межах застаецца адназначнай і непахіснай».
Рада Эўропы яшчэ раз заклікала неадкладна спыніць канфлікт і вярнуць мір на эўрапейскі кантынэнт.
Раней з заявамі пра непрызнаньне анэксіі новых украінскіх тэрыторый выступілі прэзыдэнт ЗША Джо Байдэн і кіраўнік ААН Антонію Гутэрыш.
Сёньня ў Маскве, у Георгіеўскай залі Крамля адбылася цырымонія падпісаньня дамоваў аб уваходжаньні ў склад Расеі акупаваных частак Данецкай, Запароскай, Луганскай і Херсонскай абласьцей Украіны.
Для падпісаньня ў Маскву прыбылі кіраўнікі прарасейскіх адміністрацый названых рэгіёнаў. Гэта кіраўнік «ДНР» Дзяніс Пушылін, кіраўнік «ЛНР» Леанід Пасечнік, а таксама лідэры прарасейскіх адміністрацый Запароскай і Херсонскай абласьцей Яўген Баліцкі і Ўладзімір Сальдо.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
