Удзельнікі маршу, пераважна жанчыны і дзеці, несьлі чэскія і ўкраінскія сьцягі, раздавалі мінакам кветкі і сувэніры ручной работы.
Удзел узялі ўкраінскі рок-гурт «Скай» і сьпявачка Севярына, а таксама дзеці з Праскай школы мастацтваў UAKidsSchool.
«Практычна ўсе ўкраінцы плакалі. Калі яны віталіся з чэхамі, якія праходзілі міма. Або калі дарылі падарункі і чулі ў адказ словы падтрымкі», — сказала адна з арганізатараў маршу Віялета Разьнічэнка.
У суботу, 3 верасьня, у Празе прайшла акцыя супраць палітыкі ўраду, частка ўдзельнікаў выступіла з антыўкраінскімі лёзунгамі.
Зь лютага сёлета, пасьля поўнамаштабнага ўварваньня Расеі ва Ўкраіну, больш за 424 тысячы грамадзян Украіны атрымалі ад Чэхіі візы з часовай абаронай. Паводле дадзеных Міністэрства адукацыі Чэхіі, у верасьні ў чэскія школы пайшлі 57–60 тысяч школьнікаў з Украіны.
Пасьля дэманстрацыі 3 верасьня прэм’ер-міністар Чэхіі Фіяла заявіў, што яна была арганізаваная «прарасейскімі сіламі».
Паводле дадзеных чэскай паліцыі, 3 верасьня каля 70 тысяч чалавек сабраліся на Вацлаўскай плошчы ў Празе на антыўрадавую дэманстрацыю. Пасьля яе прэм’ер-міністар Пэтр Фіяла заявіў журналістам, што ў Чэхіі адбываюцца прарасейскія дэзынфармацыйныя кампаніі і што частка насельніцтва падпадае пад іх уплыў.
Фіяла дадаў, што кожны мае права выказваць сваю думку і праводзіць дэманстрацыі. «Тлумачэньні падзей, якія я меў магчымасьць бачыць да гэтага часу, паказваюць на рэзка прарасейскія настроі, і, на мой погляд, дэманстрацыя не адпавядае інтарэсам Чэхіі і нашых грамадзян», — дадаў Фіяла.
Пасьля гэтай заявы Фіялы з розных бакоў палітычнага спэктру пачалася крытыка ягоных словаў.
Ваявода Паўднёвачэскага краю і старшыня Саюзу рэгіёнаў Марцін Куба заявіў, што словы Фіялы былі няўдалыя. Паводле Кубы, урад не павінен недаацэньваць страх людзей перад цяперашнім ростам цэнаў і крызісам і павінен даць ім зразумець, што дапаможа ім у гэтай сытуацыі.
Віцэ-сьпікер Палаты прадстаўнікоў Яна Мрачкава Вілдумецава таксама ахарактарызавала заяву Фіялы аб дэманстрацыі як прыкрую. Яна заявіла, што ня згодная з усімі выступоўцамі на мітынгу, але пратэстоўцы карыстаюцца яе падтрымкай. Паводле яе слоў, урад дрэнна дае рады бягучай сытуацыі.
Губэрнатар Лібэрэцкага краю Марцін Пута таксама выказаў сваё разуменьне ўдзелу людзей у дэманстрацыі. Ён заявіў, што нельга камэнтаваць такі маштабны пратэст толькі словамі аб прарасейскіх арганізатарах мітынгу. «Урад павінен зь імі размаўляць, і яго нельга зьмякчыць, закляйміўшы арганізатараў дэманстрацыі людзьмі, якія падтрымліваюць Пуціна. Думаю, за апошнія два тыдні міністры зразумелі, што сытуацыя няпростая», — сказаў Пута.
Паводле словаў дэпутата ад сацыял-дэмакратаў Яна Хрнчыржа, заявы Фіялы былі напышлівыя і дурныя. Хрнчырж сказаў, што ня думае, што дэманстрацыя была арганізаваная прарасейскімі сіламі. Паводле яго слоў, выступы на дэманстрацыі былі пра бязвыхадную сытуацыю, калі ўрад ня можа дапамагчы людзям.
Пракамэнтавалі суботнюю дэманстрацыю і міністры. Так, міністар рэгіянальнага разьвіцьця Іван Барташ напісаў у Твітэры, што ня хоча прымяншаць занепакоенасьць людзей наконт энэргетычнага крызісу і навешваць ярлык прыхільнікаў пракрамлёўскага руху на любога, хто ставіць пад сумненьне дзеяньні ўраду.
«Так, Крэмль і экстрэмісты выкарыстоўваюць цяперашнюю складаную сытуацыю, смутныя часы, каб узрушыць грамадзтва, а сярод арганізатараў учорашняй дэманстрацыі іх было нямала. Але, напэўна, ёсьць і шэраг зусім звычайных людзей, сем’яў, прадпрымальнікаў, якіх хвалюе пэрспэктыва на найбліжэйшыя месяцы. Мы тут ня дзеля таго, каб кінуць выклік іх страхам, мы тут, каб у іх не было гэтых страхаў», — напісаў Барташ у сацыяльных сетках.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
