Раней афіцыйная Рыга ў адказ на паўнамаштабнае ўварваньне Расеі ва Ўкраіну 24 лютага прыпыніла выдачу грамадзянам Расеі візаў, у тым ліку памежных, ва ўсіх дыпляматычных і консульскіх прадстаўніцтвах Латвіі за мяжой, паведамілі латвійскія СМІ.
У сувязі з рашэньнем Расеі закрыць латвійскае консульства ў Пскове выдача памежных дазволаў стала немагчымай, бо гэта было адзінае дыпляматычнае і консульскае прадстаўніцтва Латвіі за мяжой, якое выдавала такія дазволы грамадзянам РФ.
Урад Латвіі таксама ўвёў санкцыі супраць расейскіх грамадзян і кампаній, МЗС краіны заклікаў жыхароў Латвіі ўстрымацца ад паездак у Расею.
Кіраўнік МЗС Латвіі Эдгарс Рынкевічс на гэтым тыдні заявіў, што Эўразьвяз павінен разгледзець магчымасьць прызнаньня Расеі дзяржавай-спонсарам тэрарызму. Ён таксама паўтарыў прапанову ўвесьці на ўзроўні ЭЗ забарону на выдачу эўрапейскіх турыстычных візаў грамадзянам РФ.
