Такія вынікі чэрвеньскага закрытага апытаньня Ўсерасейскага цэнтру вывучэньня грамадзкай думкі (УЦДГМ) пра стаўленьне расейцаў да так званай «спэцапэрацыі», зь якімі азнаёмілася выданьне The Bell.
Апытаньне пад назвай «СВА: Праблемныя зоны» праводзілася праз тэлефон сярод 1600 рэспандэнтаў. Вынікі дасьледаваньня разглядаліся на адной з нарад у адміністрацыі прэзыдэнта ў 20-х днях чэрвеня, паведаміў выданьню блізкі да Крамля суразмоўца.
Як расейцы ставяцца да працягу вайны
Галоўны вынік апытаньня — падзел роўна напалову адказаў на пытаньне аб тым, што для Расеі цяпер важней — працягваць ваенныя дзеяньні ва Ўкраіне або весьці мірныя перамовы. За той і другі варыянт адказу прагаласавала па 44% апытаных, яшчэ 12% не змаглі адказаць на пытаньне.
Іншае пытаньне сацыёлягаў аб будучыні вайны гучала так: «Адны лічаць, што баявыя дзеяньні ва Ўкраіне неабходна спыніць як мага хутчэй. Іншыя лічаць, што баявыя дзеяньні зараз спыняць ня варта. Які пункт гледжаньня вам бліжэйшы — першы ці другі?» Тут большасьць у прыхільнікаў працягу вайны: 57% супраць 30%, астатнія — не змаглі адказаць.
Як расейцы ўвогуле ставяцца да вайны
Да 22 чэрвеня доля тых, хто хутчэй яе падтрымлівае зафіксавалася на ўзроўні 70% (пытаньне ў гэтым месяцы задавалі штотыдзень). Доля тых, хто хутчэй не падтрымлівае, склала 17%, яшчэ 13% не змаглі адказаць.
Характэрна, што на наступны дзень пасьля аб’явы аб спэцапэрацыі ў яе падтрымку выказвалася самая меншая за час назіраньняў УЦДГМ колькасьць рэспандэнтаў: 65%.
- Менш за ўсё вайну падтрымліваюць ва ўзроставай групе 18–24 гады: 37% хутчэй не падтрымліваюць, 38% — хутчэй падтрымліваюць.
- У групе 25–34 гады гэта 26% і 50% адпаведна.
- 35–44 гады — 18% і 72%.
- 45 і 59 гадоў — 12% і 79%.
- 60 гадоў і старэйшыя — 9% і 84%.
У разрэзе груп мэдыяспажываньня:
- сярод тых, хто адносіць сябе да актыўных тэлегледачоў, 81% хутчэй падтрымлівае «спэцапэрацыю» (доля тых, хто хутчэй супраць, — 11%);
- сярод актыўных карыстальнікаў інтэрнэту колькасьць прыхільнікаў вайны памяншаецца да 45% (доля тых, хто хутчэй супраць, — 33%).
У разрэзе самаацэнкі матэрыяльнага становішча:
- сярод тых, хто ацэньвае сваё матэрыяльнае становішча як добрае, — не падтрымліваюць вайну 15%, падтрымліваюць 75%;
- як сярэдняе — не падтрымліваюць 17%, падтрымліваюць 71%;
- як дрэннае — не падтрымліваюць 22%, падтрымліваюць 61%.
На пытаньне «Як Вы ў цэлым ставіцеся да спэцыяльнай ваеннай апэрацыі на Украіне»:
- 68% апытаных адказалі «хутчэй станоўча» — і гэта самы высокі працэнт, якога ўдавалася дасягнуць за ўвесь час апытаньняў УЦДГМ, пачынаючы зь лютага;
- 18% апытаных ставяцца да вайны «хутчэй адмоўна» — самы нізкі працэнт зь лютага, калі паказчык складаў 27%;
- адказ «хутчэй абыякава» выбралі 5% рэспандэнтаў;
- не змаглі адказаць 9%.
У самай маладой групе рэспандэнтаў адказы на гэтыя пытаньні разьмеркаваліся пароўну: 37% на 37%, і 12% паведамілі аб сваёй абыякавасьці. У групе 25–34 года суадносіны склалі 33% на 45%, а доля абыякавых да вайны — 11%.
Як галасуе моладзь
Адна з самых паказальных высноваў, якія можна зрабіць на аснове апытаньня: маладыя расейцы настроены на спыненьне вайны, а іх стаўленьне да Пуціна ў сувязі са «спэцапэрацыяй» і санкцыямі мяняецца ня ў лепшы бок.
«За» перамовы замест працягу баявых дзеяньняў выступае большасьць сярод людзей маладога і сярэдняга ўзросту:
- у групе 18–24 гады на карысьць перамоваў выказаліся 79% апытаных;
- у групе 25–34 года — 56%;
- у групе 35–44-гадовых — 46%.
Чым рэспандэнты старэйшыя, тым больш сярод іх лічаць, што Расеі трэба працягваць ваяваць: 54% у групе 45–59 гадоў і 57% у групе 60+.
За больш хуткае спыненьне баявых дзеяньняў таксама выступае ў асноўным моладзь — і зь вялікай перавагай у сваіх узроставых групах: у групах 18–24 гады і 25-34 гады за спыненьне баявых дзеяньняў як мага хутчэй выказваецца большасьць.
- У першай групе гэта 56% супраць 19% прыхільнікаў працягу ваенных дзеяньняў.
- У другой — 43% супраць 41%.
У больш узроставых групах прыхільнікаў працягу вайны больш: у групе 35–44 гады іх 52% супраць 34%, 45–59 гадоў — 70% супраць 21%, 60 гадоў і старэйшыя — 72% супраць 20%.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе на просьбу груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах вобласьцяў. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб’екты, расейцы пачалі бамбіць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фатаздымкаў, на якіх відаць сотні нябожчыкаў, ахвяраў масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Горад быў акупаваны расейскімі войскамі ў першыя дні вайны фактычна без баёў. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый і ў Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якіх Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпра, Кіева, Харкава, Адэсы і іншых месцаў. Дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя процілегламу боку тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ карпарацыі «Роснефть» і завод «Лукойла» ў Кстове ў Ніжагародзкай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі думку, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16–18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- У красавіку высьветлілася, што мірныя перамовы пакуль ня маюць посьпеху, а тым часам Украіна заявіла, што ведае імёны 155 кітайскіх наймітаў, якія падпісалі кантракты з Расеяй і пайшлі на вайну. Афіцыйны Пэкін заявіў, што сваіх грамадзянаў на вайну не адпраўляў, а наадварот, раіў жыхарам краіны трымацца падалей ад абодвух бакоў.
- Дзяржаўны ўкраінскі праект «Хачу жыць», які выконвае Каардынацыйны штаб у пытаньнях абыходжаньня з ваеннапалоннымі, у красавіку 2025 году апублікаваў прозьвішчы 742 грамадзян Беларусі, якія з 2023 году ваююць супраць Украіны на баку Расеі, зь іх 96 ужо загінулі.
- 1 чэрвеня на Дзень расейскай авіяцыі Ўкраіна правяла маштабную апэрацыю «Павуціньне». Служба бясьпекі Ўкраіны зладзіла ўдары па авіябазах па ўсёй тэрыторыі Расеі, зьнішчыўшы дзясяткі расейскіх вайсковых самалётаў. Дакладна невядома, адкуль кіраваліся гэтыя дроны і ці выкарыстоўвалі яны штучны інтэлект для нацэльваньня на расейскія самалёты. Паводле ўкраінскага боку, дахі грузавікоў, дзе хаваліся дроны, адчынялі дыстанцыйна, каб дазволіць квадракоптэрам узьлятаць.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
