«Голас Амэрыкі» паведамляе, што, выступаючы ў Мадрыдзе з нагоды 40-годзьдзя ўступленьня Гішпаніі ў NATO, Столтэнбэрг заявіў, што ён зь нецярпеньнем чакае магчымасьці вітаць Швэцыю і Фінляндыю на саміце Паўночнаатлянтычнага альянсу, які пройдзе 29–30 чэрвеня.
«На мадрыдзкім саміце мы акрэсьлім шлях наперад на наступнае дзесяцігодзьдзе, — сказаў ён. — Да нас таксама далучацца Фінляндыя і Швэцыя, якія толькі што падалі гістарычныя заяўкі на ўступленьне ў наш альянс».
Тым часам прэм’ер-міністар Турэччыны Рэджэп Таіп Эрдаган зноў заявіў, што ён супраць уступленьня Швэцыі і Фінляндыі ў NATO, пакуль яны будуць працягваць падтрымку Працоўнай партыі Курдыстану (ППК).
«Турэччына лічыць, што прыём Швэцыі і Фінляндыі нясе рызыкі для яе ўласнай бясьпекі і будучыні арганізацыі», — напісаў Рэджэп Таіп Эрдаган у артыкуле, апублікаваным у часопісе Economist.
«Мы маем поўнае права чакаць, што гэтыя краіны, якія разьлічваюць на тое, што другое па велічыні войска NATO прыйдзе на іх абарону ў адпаведнасьці з артыкулам 5, будуць перашкаджаць вярбоўцы, фінансаваньню і прапагандысцкай дзейнасьці ППК», — дадаў ён.
Для таго каб Швэцыя і Фінляндыя сталі ўдзельніцамі Альянсу, ухваліць іх заяўкі на ўступ у арганізацыю павінны ўсе дзейныя чальцы NATO.
