Пра гэта паведамляе DW.
«Расея брала на сябе абавязаньні не нападаць на суседзяў, што яна зараз робіць, і праводзіць рэгулярныя кансультацыі з NATO, чаго яна ня робіць», — растлумачыў Джаанэ.
«Сама Масква пазбавіла ўсякага зьместу Асноватворны акт Расея — NATO, напаўшы на Ўкраіну і спыніўшы дыялёг з Альянсам», — канстатаваў намесьнік генэральнага сакратара NATO.
«Цяпер у нас няма ніякіх абмежаваньняў, каб мець трывалую пазыцыю на ўсходнім флянгу. І мы можам забясьпечыць, каб кожная квадратная цаль тэрыторыі NATO была абароненая пятым артыкулам і нашымі саюзьнікамі», — падкрэсьліў ён.
Канчатковае рашэньне могуць прыняць у чэрвені
Падпісаны Расеяй і NATO у 1997 годзе Асноватворны акт вызначаў, што бакі не разглядаюць адзін аднаго ў якасьці праціўнікаў, абавязваюцца паважаць тэрытарыяльную цэласнасьць іншых дзяржаваў і прызнаюць за эўрапейскімі краінамі права выбару шляхоў гарантаваньня ўласнай бясьпекі.
Дакумэнт таксама вызначаў мэханізмы і прынцыпы ўзаемных кансультацый, абмену інфармацыяй адносна ваенных дактрынаў, бюджэтаў і вайсковых стратэгіяў, а таксама правядзеньня сумесных апэрацый і вучэньняў.
У лютым, за некалькі дзён да расейскага ўварваньня ва Ўкраіну, міністры абароны 30 краін-удзельніц NATO далі вайсковаму кіраўніцтву мандат на распрацоўку плянаў умацаваньня ўсходняга флянгу Альянсу.
Генэральны сакратар арганізацыі Енс Столтэнбэрг тады казаў, што гаворка ідзе пра «новыя тактычныя групы ва Ўсходняй і Паўднёва-Ўсходняй Эўропе». Канчатковае рашэньне могуць прыняць на саміце Альянсу ў Мадрыдзе ў канцы чэрвеня.
