Колішні валянтэр штабу Віктара Бабарыкі адбыў 2-гадовы тэрмін на «хіміі» і выйшаў на волю. Лявона Халатрана асудзілі паводле артыкулу 341 ч. 1 КК («Арганізацыя альбо падрыхтоўка групавых дзеяньняў, якія груба парушаюць грамадзкі парадак»).
Халатран выйшаў на волю 21 траўня, паведаміла ініцыятыва dissidentby.
«Хвілінка сымбалізму: я правёў на хіміі роўна 342 дні паводле артыкулу 342», – напісаў Лявон у Instagram.
Халатран кіраваў барам у прасторы «ОК16». Яго затрымалі 11 жніўня. Абвінавацілі ва ўдзеле ў беспарадках. Сам Халатран віны не прызнаў, сьцьвярджаў, што выйшаў са штабу прагуляцца на 25 хвілін.
Пасьля суду, калі яго на пэўны тэрмін адпусьцілі з-пад варты перад адпраўкай на «хімію», Халатран расказваў пра зьдзекі зь вязьняў. Пры гэтым ён сьцьвярджаў, што зьдзекуюцца не супрацоўнікі «Валадаркі», а ГУБАЗіК.
Што такое «хімія» і «хатняя хімія»
«Хімія» — адбыцьцё пакараньня абмежаваньнем волі ў папраўчай установе адкрытага тыпу. Выраз зьявіўся ў СССР у пасьляваенныя часы, калі працу асуджаных пачалі актыўна выкарыстоўваць на будоўлях і шкодных вытворчасьцях (у тым ліку на хімічных прадпрыемствах). У Беларусі 29 папраўчых установаў адкрытага тыпу, або «хіміяў».
Праз пакараньне «хіміяй» прайшоў шмат хто зь беларускіх апазыцыянэраў.
«Да мяне маглі прыяжджаць наведнікі, мы сустракаліся і размаўлялі ў дворыку спэцкамэндатуры. Карыстаўся мабільным тэлефонам, даходзілі лісты, я пісаў з „хіміі“ нататкі... Некалькі разоў дазвалялі зьезьдзіць да бацькоў», — згадваў Павал Севярынец пра сваю «хімію» ў Пружанскім раёне, дзе працаваў на складзе мясцовай гаспадаркі.
«Хіміяй» часта заканчваюцца адседкі вязьняў, якія былі асуджаныя на вялікія тэрміны зьняволеньня, але праз добрыя паводзіны заслужылі палёгку.
Пакараньне «абмежаваньнем волі» магчыма адбыць і на так званай «хатняй хіміі» — калі ў прысудзе выкарыстоўваецца фармулёўка «без накіраваньня ў папраўчую ўстанову адкрытага тыпу». Фактычна гэта сумесь «хіміі», якая прадугледжвае абавязковую прымусовую працу, і адбыцьця пакараньня з адтэрміноўкай, калі асуджаны знаходзіцца дома, але пад рэгулярным пільным кантролем міліцыі.
10 відаў няволі: гід па беларускіх турмах
