«Мы адпрэчваем гэтыя абуральныя штрафы, якія накладаюцца расейскім урадам за фактычныя рэпартажы РСЭ/РС аб несправакаванай вайне Расеі супраць Украіны. Расейцы ведаюць, што Радыё Свабода ня хлусіць і ня будзе хлусіць сваёй аўдыторыі, таму расейцы працягваюць наведваць нашы сайты і глядзець наш кантэнт, нягледзячы на нападкі Крамля на нас», — заявіў прэзыдэнт мэдыякарпарацыі «Радыё Свабодная Эўропа/Радыё Свабода» Джэймі Флай.
Гэта ўжо чацьвёрты аналягічны штраф. У Расеі Радыё Свабода за апошні месяц аштрафавалі на 15, 12, 8 і 18 мільёнаў рублёў.
З пачатку вайны ва Ўкраіне свабода прэсы ў Расеі практычна перастала існаваць, а ўзровень цэнзуры — «нябачаны з савецкіх часоў». Такую выснову зрабілі экспэрты міжнароднай арганізацыі «Рэпартэры бязь межаў» (RSF).
- Расея заняла ў штогадовым рэйтынгу краін па ўзроўні свабоды прэсы 155-е месца са 180. Гэта найгоршы паказчык у гісторыі краіны. Год таму Расея была на 150-м месцы. Паводле дадзеных «Рэпартэраў бязь межаў», яшчэ да пачатку ўварваньня Расеі ва Ўкраіну, якое адбылося 24 лютага 2022 году, Крэмль істотна ўзмацніў ціск на незалежныя СМІ і журналістаў.
- У 2017 годзе ў Расеі быў прыняты закон аб СМІ — «замежных агентах». Пасьля гэтага расейскія ўлады прызналі «агентамі» Радыё Свабода, Голас Амэрыкі, тэлеканал «Настоящее время», тэлеканал «Дождь» і многія іншыя незалежныя выданьні, а таксама дзясяткі журналістаў.
