Дэпутат Вярхоўнай Рады Ўкраіны Аляксей Ганчарэнка паведаміў пра як мінімум адну ахвяру — 15-гадовага хлопца, і адну параненую — 17-гадовую дзяўчыну. Пры гэтым, як заявіў Ганчарэнка, паводле папярэдніх зьвестак, ёсьць і іншыя загінулыя і пацярпелыя.
Гэта ня першы ракетны ўдар, нанесены па Адэсе. 30 красавіка ў выніку абстрэлу была выведзеная са строю ўзьлётна-пасадачная паласа мясцовага аэрапорту. За тыдзень да гэтага снарад трапіў у жылы дом на ўскраіне гораду. Тады загінулі восем чалавек, сярод якіх трохмесячная дзяўчынка, яе маці і бабуля. Яны сталі першымі за два месяцы вайны мірнымі жыхарамі, якія загінулі ў Адэсе, што далёка ад лініі фронту.
У Міністэрстве абароны Расеі ў той дзень заявілі, што «высокадакладнай зброяй» быў зьнішчаны вайсковы аэрадром пад Адэсай.
