Імя журналіста ён не назваў. РИА Новости пазьней са спасылкай на ФСБ паведаміла, што гаворка ідзе пра Ўладзіміра Салаўёва — аднаго з найбольш вядомых тэлевядучых Усерасейскай дзяржаўнай тэлерадыёкампаніі, які агучвае пракрамлёўскія пазыцыі. Згодна з паведамленьнем ведамства, затрымалі групу «чальцоў забароненай у РФ нэанацысцкай тэрарыстычнай арганізацыі», у якіх канфіскавалі «самаробнае выбуховае прыстасаваньне, 8 самаробных „кактэйляў Молатава“, 6 пісталетаў ПМ, абрэз паляўнічай стрэльбы, гранату РГД-5, наркатычныя сродкі, падробленыя ўкраінскія пашпарты».
У Сьледчым камітэце РФ удакладнілі, што затрымалі 6 чалавек. Як сьцьвярджаецца, гэта грамадзяне Расеі. Заданьне забіць Салаўёва нібыта дала ім Служба бясьпекі Ўкраіны (СБУ).
У СБУ ў адказ заявілі, што яны сыстэмна займаюцца ўзмацненьнем бясьпекі Ўкраіны і ня маюць намеру «сур’ёзна камэнтаваць новыя фантазіі расейскіх спэцслужбаў, якія проста прыдумляюць чарговыя дасягненьні для расейскай аўдыторыі». У ведамстве адзначылі, што Служба бясьпекі Ўкраіны «ня мае ніякіх плянаў па забойстве» Ўладзіміра Салаўёва.
«Салаўёў зьяўляецца не грамадзкім дзеячам, а звычайным прапагандыстам — расейскім аналягам Гёбэльса, які абавязкова будзе адказваць за свае злачынствы ў міжнародных судах пасьля перамогі Ўкраіны», — гаворыцца ў паведамленьні СБУ.
Салаўёў 23 красавіка ў сваёй праграме казаў: «Зяленскі на мяне паскардзіўся і папрасіў, каб са мной разабраліся». У панядзелак ён заявіў РИА Новости, што «дзякуе супрацоўнікам ФСБ за тое, што гора не прыйшло ў яго дом сёньня».
Па словах Пуціна, за падрыхтоўкай замаху стаялі замежныя спэцслужбы. У сувязі з гэтым ён згадаў «спэцыяльную ваенную апэрацыю» ва Ўкраіне. Расейскі прэзыдэнт сказаў, што краіны Захаду хочуць раскалоць расейскае грамадзтва, але яно «праяўляе згуртаванасьць, падтрымлівае ўзброеныя сілы», таму краіны Захаду «на інфармацыйным полі церпяць паразу». Па словах Пуціна, яны «абдурваюць сваіх грамадзянаў, але церпяць фіяска тут, на тэрыторыі Расеі», таму вырашылі «перайсьці да тэрору».
Як заявіў Пуцін, расейскім уладам «па прозьвішчах вядомыя куратары з ЦРУ», якія нібыта стаяць за апэрацыямі Ўкраіны супраць Расеі і даюць «такія парады, як забойства журналістаў».
Прэзыдэнт Расеі заклікаў супрацоўнікаў пракуратуры змагацца з экстрэмізмам, у тым ліку з арганізацыяй няўзгодненых акцыяў пратэсту і з «распаўсюдам фэйкаў». Ён таксама заявіў, што неабходна расьсьледаваць злачынствы, якія «нэанацысты» нібыта ўчыняюць ва Ўкраіне.
Якіх-небудзь доказаў падрыхтоўкі замаху на Салаўёва ані Пуцін, ані ФСБ пакуль не далі.
Аляксандар Лукашэнка летась, абвінавачваючы сваіх палітычных апанэнтаў у падрыхтоўцы тэрактаў у Беларусі, сьцьвярджаў, што плянавалася забойства тэлевядоўцы Рыгора Азаронка: «Мэта, цытую, — абезрухоміць, захапіць, кінуць у багажнік. Вывезьці ў лес у самае глухое месца, адрэзаць язык. Узяць нажніцы, каб сам гэта зрабіў», — казаў тады Лукашэнка.
