Сьцьвярджаюць, што падазраваны працаваў на замежную выведку, а адной зь яго задачаў было «стварэньне ў грамадзтве русафобскіх настрояў» і распаўсюд антырасейскай прапаганды.
Заяву КНБ перадае дзяржаўнае агенцтва «Казинформ». Сьцьвярджаецца, што падазраваны рыхтаваў замахі і на іншых чыноўнікаў і плянаваў учыніць тэракты ў дачыненьні да супрацоўнікаў сілавых структур. Заяўляецца, што затрыманы прызнаўся ў выкананьні заданьняў замежнай дзяржавы.
На якую краіну мог працаваць затрыманы — не ўдакладняецца.
«Казинформ» распаўсюдзіў фатаграфіі з наяўнымі далярамі ЗША і снайпэрскай стрэльбай, якія, як пішуць, сканфіскавалі ў падазраванага пры затрыманьні ў сталіцы краіны.
- 68-гадовы Такаеў быў абраны на пасаду прэзыдэнта ў 2019 годзе на пазачарговых выбарах, зьмяніўшы першага прэзыдэнта Нурсултана Назарбаева. Палітык у розныя часы быў прэм’ер-міністрам Казахстану і міністрам замежных справаў.
- У студзені 2022 года ў Казахстане прайшлі маштабныя пратэсты, якія перарасьлі ў беспарадкі, жорстка здушаныя вайскоўцамі. Такаеў карыстаўся публічнай падтрымкай Масквы — у краіну быў уведзены кантынгент войскаў АДКБ.
- На гэтым тыдні першы намесьнік кіраўніка адміністрацыі прэзыдэнта Казахстану Цімур Сулейменаў заявіў, што Казахстан ня будзе інструмэнтам для абыходу санкцыяў ЗША і Эўразьвязу ў дачыненьні да Расеі.
- «Мы будзем выконваць санкцыі. Нягледзячы на тое, што мы зьяўляемся часткай эканамічнага саюзу з Расеяй, Беларусьсю і іншымі краінамі, мы таксама зьяўляемся часткай міжнароднай супольнасьці. Таму менш за ўсё мы хочам, каб да Казахстану ўжываліся другасныя санкцыі ЗША і ЭЗ», — падкрэсьліў Сулейменаў.
