Прэм’еры Польшчы, Чэхіі і Славеніі каля гадзіны таму на цягніку перасеклі польска-ўкраінскую мяжу і накіроўваюцца ў Кіеў, заявіў падчас прэс-брыфінгу кіраўнік канцылярыі кіраўніка польскага ўраду Міхал Дворчык.
«Візыт рыхтаваўся шмат дзён, але трымаўся ў сакрэце», — дадаў Дворчык, падкрэсьліўшы, што рашэньне пра паездку было прынята на саміце Эўразьвязу ў Вэрсалі пад Парыжам.
Мэта візыту кіраўнікоў урадаў — пацьвердзіць адназначную падтрымку ўсім Эўразьвязам сувэрэнітэту і незалежнасьці Ўкраіны і прадставіць шырокі пакет падтрымкі ўкраінскай дзяржаве і грамадзтву, пра гэта заявілі ва ўрадавым інфармацыйным цэнтры Польшчы:
«Прэмʼер-міністар Польшчы Матэвуш Маравецкі і віцэ-прэмʼер, старшыня Камітэту нацыянальнай бясьпекі і абароны Польшчы Ярослаў Качыньскі разам з прэмʼер-міністрам Чэхіі Пэтрам Фіялам і прэмʼер-міністрам Славеніі Янэзам Яншам едуць сёньня ў Кіеў у якасьці прадстаўнікоў Эўрапейскай рады прыбудуць на сустрэчу з прэзыдэнтам Украіны Ўладзімірам Зяленскім і прэмʼер-міністрам Украіны Дзянісам Шмыгалём.
Паездка арганізаваная па ўзгадненьні са старшынёй Эўрапейскай Рады Шарлем Мішэлем і старшынёй Эўракамісіі Урзуляй фон дэр Ляен. Міжнародная супольнасьць інфармуецца аб візыце дэлегацыі празь міжнародныя арганізацыі, у тым ліку Арганізацыю Абʼяднаных Нацый».
Маравецкі згадаў пра паездку ў Тбілісі падчас нападу Расеі на Грузію
«На 20-ы дзень злачыннай агрэсіі Пуціна супраць Украіны мы едзем у Кіеў, каб паказаць украінцам нашу салідарнасьць», — падкрэсьліў Матэвуш Маравецкі.
«Сёньня Грузія, заўтра Украіна, пасьлязаўтра краіны Балтыі, а потым, можа, час для маёй краіны, для Польшчы». Гэта тое, што казаў 14 гадоў таму Лех Качыньскі ў сталіцы Грузіі Тбілісі падчас расейскага ўварваньня ў краіну. Тады яго візыт зьмяніў уяўленьне аб гэтай вайне, і вялікі ўчынак мужнасьці надаў грузінам дух і яго памятаюць ва ўсім сьвеце і сёньня.
Мы накіроўваемся туды па ўзгадненьні і каардынацыі з Эўразьвязам і яго найбольш важнымі прадстаўнікамі — кіраўніком Савета ЭЗ Шарлем Мішэлем, кіраўніцай Эўракамісіі і ААН Урсулай фон дэр Ляен.
У такія пераломныя для сьвету часы, наш абавязак — быць там, дзе куецца (выкоўваецца) гісторыя. Таму што гаворка не пра нас, а пра будучыню нашых дзяцей, якія заслугоўваюць жыць у сьвеце, свабодным ад тыраніі", — адзначыў прэм’ер міністар Польшчы ў сваёй заяве.
У час расейска-грузінскай вайны 2008 году сваім візытам лідэры пяці эўрапейскіх краін, сярод якіх прэзыдэнт Эстоніі Томас Ільвес, прэзыдэнт Літвы Валдас Адамкус, прэзыдэнт Польшчы Лех Качыньскі і прэм’ер Латвіі Івар Годманіс падтрымалі Грузію. 12 жніўня 2008 году ўвечары кіраўнікі замежных дзяржаў прыбылі ў Тбілісі, дзе ўзялі ўдзел у масавым мітынгу ў цэнтры грузінскай сталіцы.
Вайна Расеі супраць Украіны
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам. Насуперак заявам Пуціна пра атакі выключна на вайсковыя аб'екты, расейцы пачалі бамбаваць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- 17 лістапада Джо Байдэн зьняў абмежаваньні на нанясеньне ўдараў амэрыканскай дальнабойнай зброяй па тэрыторыі Расеі.
- З прыходам да ўлады ў ЗША Дональда Трампа рэзка актывізавалася тэма магчымых мірных перамоваў. Прэзыдэнт ЗША абнавіў свае патрабаваньні да эўрапейскіх краінаў-сяброў NATO павялічваць выдаткі на абарону. Таксама палітык заявіў, што хоча, каб Украіна дала Злучаным Штатам кантроль за сваімі радовішчамі рэдказямельных выкапняў у абмен на фінансавую падтрымку яе ваенных дзеяньняў супраць Расеі.
- У ноч на 14 лютага Расея бесьпілётнікам атакавала Чарнобыльскую АЭС, на саркафагу над разбураным у 1986-м пры чарнобыльскай катастрофе энэргаблёку пачаўся пажар, які ня могуць патушыць некалькі дзён.
- 12 лютага 2025 Трамп пагутарыў па тэлефоне з Пуціным, і 18 лютага 2025 году ў Эр-Рыядзе (Саудаўская Арабія) пачалася двухбаковая сустрэча з удзелам дзяржаўнага сакратара ЗША Марка Рубіё і кіраўніка МЗС Расеі Сяргея Лаўрова. Украіна на перамовы не запрошаная. Перад гэтым у Мюнхэне (Нямеччына) і Парыжы (Францыя) адбыліся, адпаведна, канфэрэнцыя па бясьпецы і саміт вядучых краінаў ЭЗ, але на іх так і ня выпрацавалі пляну доўгатэрміновай падтрымкі Ўкраіны. Акрамя таго, Вугоршчына — сябра Эўразьвязу, NATO і пры гэтым ляяльная да Расеі — дыстанцыявалася ад абмеркаваньня далейшай вайсковай дапамогі Кіеву, абвінаваціўшы іншыя краіны ў падбухторваньні далейшай вайны.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
