Прэзыдэнты выказалі розныя пазыцыі па пытаньні аб тым, хто нясе адказнасьць за напружанасьць на ўсходзе Ўкраіны. Пра гэта паведаміў дарадца прэзыдэнта Францыі.
Як паведамляецца, Макрон усклаў віну за абвастрэньне сытуацыі на Данбасе на прарасейскіх сэпаратыстаў, а Пуцін — на Ўкраіну.
Прадстаўнік кіраўніцтва Францыі таксама паведаміў, што прэзыдэнты дзьвюх краін пагадзіліся адна з адной у тым, што трохбаковая сустрэча прадстаўнікоў АБСЭ, Украіны і Расеі адбудзецца ў панядзелак.
Парыж заявіў, што перамовы Пуціна і Макрона разглядаюцца як апошняя магчымая спроба пазьбегнуць канфлікту Расеі і Ўкраіны.
Паводле дадзеных BFM TV, Пуцін і Макрон гаварылі аб тым, як пазьбегнуць буйной вайны ў Эўропе на фоне асьцярог Захаду з нагоды магчымага нападу Расіі на Ўкраіну.
У паведамленьні Крамля аб тэлефоннай размове гаворыцца, што была выказана сур’ёзная заклапочанасьць рэзкім пагаршэньнем абстаноўкі на лініі судакрананьня ў Данбасе. Пры гэтым прычынай эскаляцыі Пуцін назваў «правакацыі ўкраінскіх сілавікоў». Расейскі прэзыдэнт таксама згадаў «напампоўку краінамі NATO Украіны сучаснымі ўзбраеньнямі і боепрыпасамі».
«З улікам вастрыні дадзенага становішча прэзыдэнты прызналі мэтазгодным актывізаваць пошук рашэньняў дыпляматычнымі сродкамі па лініі зьнешнепалітычных ведамстваў і палітдарадцаў лідэраў краін-удзельніц „нармандзкага“ фармату», — гаворыцца ў паведамленьні Крамля. У Маскве зноў абвінавацілі Кіеў у адмове ад рэалізацыі Менскіх пагадненьняў.
Пасьля размовы з Пуціным Макрон перагаварыў з прэзыдэнтам Украіны Уладзімірам Зяленскім.
Па выніках размовы Зяленскі напісаў у твітэры, што Кіеў і Парыж выступаюць за неадкладнае скліканьне паседжаньня Трохбаковай кантактнай групы і ўвядзеньне рэжыму цішыні ў Данбасе.
Апошнія тыдні прэзыдэнты Францыі і Расеі некалькі разоў размаўлялі па тэлефоне, а 7 лютага сустракаліся асабіста ў Маскве. Пасьля перамоваў Макрон паведаміў, што яму ўдалося прадухіліць эскаляцыю расейска-ўкраінскага канфлікту. Пасьля гэтага францускі лідэр наведаў Кіеў і Бэрлін.
- Аб нарошчваньні расейскай вайсковай групоўкі паблізу Ўкраіны ўжо некалькі месяцаў папярэджваюць заходняя выведка і іншыя крыніцы. Краіны Захаду лічаць, што Крэмль плянуе нападзеньне на суседнюю краіну.
- Масква заяўляе аб правядзеньні вайсковых вучэньняў на сваёй тэрыторыі і любыя абвінавачаньні ў агрэсіі ў дачыненьні да Ўкраіны абвяргае. Расейскі МЗС называе абвінавачваньні гістэрыяй.
- Апошнія дні сэпаратысты ў Данбасе сьцьвярджаюць, што ўкраінскія войскі рыхтуюцца да наступу на іх пазыцыі. Кіеў гэта катэгарычна адмаўляе. Эўразьвяз заявіў, што лічыць беспадстаўнымі заявы «ДНР» і «ЛНР» аб плянах Украіны на пасьці на іх.
- Амерыканскі прэзідэнт Джо Байдэн, выступаючы на днях у Белым доме, звярнуўся да расійскага народа, сказаўшы, што ЗША не пагражаюць яму, і што Злучаныя Штаты не з’яўляюцца яго ворагам. Па словах Байдэна, Вашынгтон не імкнецца дэстабілізаваць Расею.
Пагроза нападу Расеі на Ўкраіну
- А 5-й гадзіне раніцы 24 лютага 2022 году кіраўнік Расеі Ўладзімір Пуцін заявіў пра пачатак ваеннай апэрацыі супраць Украіны на Данбасе па просьбе груповак «ДНР» і «ЛНР». 21 лютага падчас тэлезвароту да расейцаў Пуцін назваў так званыя «ДНР» і «ЛНР» незалежнымі дзяржавамі ў межах абласьцей. 22 лютага Савет Фэдэрацыі ратыфікаваў гэтае рашэньне.
- Расейскія войскі атакавалі ў тым ліку з тэрыторыі Беларусі, выкарыстоўваючы лётнішчы, базы і дарогі. Прадстаўнікі рэжыму Лукашэнкі апраўдваюць вайну, яго праціўнікі лічаць тэрыторыю Беларусі акупаванай, многія заклікаюць да супраціву расейскім захопнікам.
- Насуперак заявам Пуціна пра атакі выключна на вайсковыя аб'екты, расейцы бамбяць школы, дзіцячыя садкі і жылыя кварталы ўкраінскіх гарадоў.
- 2 красавіка 2022 году, пасьля вызваленьня гораду Буча пад Кіевам, фотакарэспандэнты апублікавалі дзясяткі фотаздымкаў, на якіх відаць сотні нябожчыкаў, ахвяр масавых забойстваў, учыненых расейскімі войскамі. Многія пахаваныя ў стыхійных брацкіх магілах. Вялікія разбурэньні прынесла расейская акупацыя і Барадзянцы.
- З 24 лютага Расея захапіла толькі адзін абласны цэнтар — Херсон. Расейскія войскі адступілі зь яго і з правабярэжнай часткі Херсонскай вобласьці ў лістападзе 2022 году. Горад быў акупаваны расейскімі войскамі ў першыя дні вайны фактычна без баёў. Увосень 2022 году ўкраінскія войскі правялі маштабны контранаступ, у выніку якога расейскія сілы пакінулі большасьць сваіх пазыцый у Харкаўскай вобласьці.
- Нягледзячы на першапачатковыя заявы Пуціна пра тое, што акупацыя ўкраінскіх тэрыторыяў не ўваходзіць у пляны ўварваньня, 30 верасьня 2022 году была абвешчана анэксія чатырох вобласьцяў Украіны (Данецкай, Запароскай, Луганскай і Херсонскай), у тым ліку і тэрыторыяў, якія Расея не кантралявала.
- 21 верасьня 2022 году Пуцін заявіў пра мабілізацыю ў Расеі. Пасьля гэтай заявы тысячы расейцаў накіраваліся на памежныя пункты і пачалі выяжджаць у Грузію, Казахстан, Армэнію, Манголію, Фінляндыю і іншыя краіны. У самой Расеі праціўнікі вайны падпалілі некалькі вайсковых камісарыятаў.
- У 2023 годзе Лукашэнка і Пуцін заявілі пра разьмяшчэньне ў Беларусі расейскай ядзернай зброі. 13 чэрвеня Лукашэнка сказаў, што частка ядзернай зброі ўжо дастаўлена з РФ у Беларусь. 16 чэрвеня Пуцін таксама заявіў, што першыя ядзерныя зарады ўжо дастаўленыя на тэрыторыю Беларусі, а астатнюю частку перамесьцяць «да канца лета або да канца году».
- 3 верасьня ўкраінскі брыгадны генэрал Аляксандар Тарнаўскі заявіў, што Ўзброеныя сілы Ўкраіны прарвалі першую лінію абароны на запароскім кірунку, на якую расейцы выдаткавалі больш за ўсё рэсурсаў.
- У канцы 2023 і на пачатку 2024 расейцы працягвалі масавыя абстрэлы ўкраінскіх гарадоў: Дніпры, Кіеве, Харкаве, Адэсе і іншых месцах дзясяткі людзей загінулі і атрымалі раненьні. Украінскі бок у адказ абстрэльваў расейскі Белгарад, некалькі чалавек загінулі. Узброеныя сілы дзьвюх краін рэгулярна атакуюць падкантрольныя адна адной тэрыторыі бесьпілётнікамі.
- Агулам з пачатку 2024 году ўкраінскія дроны пашкодзілі 18 расейскіх НПЗ, што прывяло да скарачэньня вытворчасьці амаль на 14%. У сакавіку былі атакаваныя такія абʼекты, як Разанскі НПЗ «Раснафты» і завод «Лукойла» ў Кстове ў Ніжагародскай вобласьці. Абодва ўваходзяць у топ-10 найбуйнейшых НПЗ Расеі і забясьпечваюць бэнзінам Маскву.
- 6 жніўня 2024 году Ўкраіна пачала апэрацыю ў Курскай вобласьці. 19 жніўня прэзыдэнт Украіны Ўладзімір Зяленскі заявіў, што пад кантролем Украіны ў ходзе апэрацыі Ўзброеных сілаў Украіны знаходзяцца 92 паселішчы Курскай вобласьці Расеі. Галоўнакамандуючы Ўзброенымі сіламі Ўкраіны Аляксандар Сырскі ўдакладніў, што такіх населеных пунктаў 82. Улады Ўкраіны заявілі пра стварэньне ваенных камэндатураў і арганізацыі перадачы «гуманітарнай дапамогі ў населеныя пункты, якія знаходзяцца пад кантролем Украіны». Экспэрты Інстытуту вывучэньня вайны, прааналізаваўшы заявы і відэаматэрыялы з геалякацыяй, выказалі меркаваньне, што Ўкраіна кантралюе ў Курскай вобласьці ня ўсю тэрыторыю ў заяўленых межах прасоўваньня.
- 16-18 жніўня ўкраінскія сілы падарвалі тры масты, якія мелі стратэгічнае значэньне для матэрыяльна-тэхнічнага забесьпячэньня групоўкі расейскіх войскаў ва Ўкраіне і вайсковай авіяцыі, якая базуецца ў Курскай вобласьці.
- Незалежная праверка інфармацыі пра ваенныя дзеяньні, якую даюць афіцыйныя асобы розных бакоў, не заўсёды магчымая.
