Афіцэр аднаго з элітных вайсковых падразьдзяленьняў Паўночнай Карэі па кібэрвайне зьнік на далёкім усходзе Расеі пасьля таго, як маскоўскія агенты сарвалі яго спробу ўцёкаў. Пра гэта паведамляюць крыніцы і дакумэнты, якія атрымала карэйская служба «Голасу Амэрыкі».
Маёр Чой Кум Чол, галоўны спэцыяліст па інфармацыйных тэхналёгіях Паўночнакарэйскай народнай арміі, зь верасьня быў у генэральным консульстве Паўночнай Карэі ва Ўладзівастоку пасьля таго, як быў арыштаваны расейскай паліцыяй у горадзе Раздольнае, што прыкладна ў гадзіне язды. 33-гадовы Чол хаваўся ў Раздольным, каб сысьці з-пад кантролю паўночнакарэйскіх уладаў, якія палявалі на яго зь ліпеня, калі ён пакінуў сваю пасаду ва Ўладзівастоку. Афіцэр вырашыў папрасіць прытулку ў маскоўскім офісе Вярхоўнага камісара ААН у справах уцекачоў.
Карэйская служба «Голасу Амэрыкі» падтрымлівала сувязь зь людзьмі, якія ведалі Чола, цягам некалькіх месяцаў. Крыніцы прадставілі копію пашпарту Чола, скрыншоты тэкставых паведамленьняў, якімі ён абменьваўся зь некаторымі зь іх, і іншыя дакумэнты.
Нягледзячы на забароны Арганізацыі Аб’яднаных Нацый на найм на працу паўночнакарэйцаў, многія па-ранейшаму працуюць ва Ўладзівастоку і побач, адпраўляючы дадому сваю рублёвую зарплату рэжыму, якому жыцьцёва неабходная цьвёрдая валюта. Як паведамляе японскае выданьне Kyodo News, група паўночнакарэйскіх IT-экспэртаў пераехала з Ганконгу ва Ўладзівасток, каб ухіліцца ад рэзалюцыі 2397 Рады Бясьпекі ААН, прынятай у сьнежні 2017 года, якая забараняе краінам даваць дазволы на працу паўночнакарэйскім работнікам і патрабуе іх выезду з працы за мяжу да сьнежня 2019 году. На тэрыторыі ж Расеі яны працуюць, нягледзячы на рэзалюцыю.
Карэйская служба «Голасу Амэрыкі» зьвязалася з рэгіянальнымі бюро Ўпраўленьня ў справах уцекачоў ААН у Маскве і Эўропе, а таксама ў МЗС Расеі і спытала, ці ведаюць яны пра спробы Чола папрасіць прытулку. Толькі ў маскоўскім офісе Ўпраўленьня адказалі, што не даюць камэнтароў па асобных выпадках.
Лідэр Паўночнай Карэі Кім Чэн Ын заявіў у 2013 годзе, што кібэрвайна, нароўні зь ядзернай зброяй і ракетамі, — «унівэрсальны меч», які гарантуе ўдарныя магчымасьці вайскоўцаў.
Рэжым адбірае маладых студэнтаў, каб навучаць іх хакерскай справе, гаворыцца ў паведамленьні паўднёвакарэйскага грамадзкага выданьня KBS.
Згодна з пасьведчаньнямі Чола, атрыманымі журналістамі, ён быў адным з тых, каго адабралі для такога навучаньня. Адукацыю ён атрымаў у Пхэньяне, наведваючы прэстыжную сярэднюю школу Кымсон, і Тэхналягічны ўнівэрсытэт Кім Чэка для студэнтаў і асьпірантаў. Паўночная Карэя спалучае адукацыю ў сярэдняй і вышэйшай школах у шасьцігадовай праграме.
