Пра гэта паведамляе прэс-сакратар Навальнага Кіра Ярмыш са спасылкай на адвакатаў. На сайце суду таксама пазначана, што паседжаньне будзе выязным.
Навальнага абвінавачваюць у двух эпізодах па артыкуле аб абразе ўдзельнікаў судовага працэсу і чатырох эпізодах па артыкуле аб махлярстве ў асабліва буйным памеры. 3 лютага аб’яднаная справа паступіла ў суд.
Пра тое, што справы аб махлярстве і абразе судзьдзі абʼядналі ў адну, стала вядома ў сярэдзіне студзеня. Па гэтых эпізодах Навальнаму пагражае да 10 гадоў пазбаўленьня волі, сказала ягоная адвакат Вольга Міхайлава. Паводле яе слоў, сьледзтва скарысталася працэдурай выдзяленьня асобных эпізодаў са справы для таго, каб прадʼяўляць Навальнаму новыя абвінавачаньні па адной і той жа справе.
Справу аб махлярстве ў асабліва буйным памеры распачалі ў дачыненьні да Навальнага і ягоных паплечнікаў у сьнежні 2020 года. Па вэрсіі сьледзтва, яны патрацілі 356 мільёнаў рублёў ахвяраваньняў, сабраных на працу фондаў апазыцыйнага палітыка.
Пра тое, што ў дачыненьні да Аляксея Навальнага распачатая справа аб абразе судзьдзі, стала вядома ў траўні падчас разгляду справы аб паклёпе на вэтэрана Другой сусьветнай вайны Ігната Арцёменку. Падчас працэсу Навальны абвінавачваў судзьдзю ў прадузятасьці і атрымаў больш за дзесяць заўваг.
- Год таму апазыцыянэр Аляксей Навальны вярнуўся ў Маскву зь Нямеччыны, дзе некалькі месяцаў лячыўся і праходзіў рэабілітацыю пасьля атручваньня ў Расеі баявым хімічным рэчывам з групы «Навічок». З таго часу ён пазбаўлены волі: спачатку Навальнага арыштавалі, а затым суд адправіў яго ў калёнію па крымінальнай справе ад 2014 года.
- Зь сярэдзіны сакавіка Аляксей Навальны знаходзіцца ў папраўчай калёніі № 2 у Пакрове Ўладзімірскай вобласьці РФ, дзе адбывае пакараньне па справе аб махлярстве. Ён, ягоныя прыхільнікі і многія праваабарончыя арганізацыі лічаць крымінальную справу палітычнай.
