Праваабаронцы пішуць, што яго плянуюць выдаць ужо сёньня, 28 сьнежня, нягледзячы на скаргі самога затрыманага і ягонай маці, пазыцыю Эўрапейскага суду правоў чалавека ў аналягічных справах і з парушэньнем працэдураў.
«Няма сумневаў, што дома Дзьмітрыю пагражаюць катаваньні і што яго не чакае справядлівы судовы разбор, — гаворыцца ў заяве. — Мы абсалютна ўпэўненыя, што экстрадыцыя Дзьмітрыя Падлобнікава ідзе ўразрэз зь міжнародным абавязаньнем Расеі не высылаць і не вяртаць асобаў, якім пагражае на радзіме палітычна матываваны перасьлед і катаваньні».
Праваабаронцы заклікаюць пракуратуру РФ як орган, адказны за ажыцьцяўленне экстрадыцыяў, і ўрад РФ як орган, які дае справаздачу перад міжнароднымі інстытутамі аб выкананьні Расеяй абавязаньняў у галіне правоў чалавека, тэрмінова прыпыніць выдачу Дзьмітрыя Падлобнікава Беларусі і даць яму магчымасьць абскардзіць рашэньне аб выдачы ў парадку, вызначаным заканадаўствам Расеі.
25-гадовы Дзьмітры Падлобнікаў выходзіў на акцыі пратэсту супраць фальсыфікацыі выбараў у Жлобіне. Яго затрымалі 9 жніўня 2020 году, пратрымалі тры дні ў Петрыкаўскім РАУС і адпусьцілі на волю. Пазьней ён выехаў на працу ў Расею, аднак у траўні 2021 году быў затрыманы там на запыт рэжыму Лукашэнкі. Дзьмітры чакаў пастановы аб экстрадыцыі ў СІЗА Каломны, нядаўна яго перавезьлі ў адзін з маскоўскіх СІЗА.
Паводле расейскіх праваабаронцаў, Падлобнікава перасьледуюць за ўдзел у мірным мітынгу, у віну яму ставяць «прычыненьне маральнай шкоды супрацоўніку міліцыі групай асобаў», а доказам служыць раздрукоўка праслухоўваньня тэлефонных размоваў яго знаёмых.
Ад жніўня 2020 году ў Расеі арыштавалі прынамсі два дзясяткі беларусаў у справах, зьвязаных з пратэстамі супраць рэжыму Лукашэнкі. Некаторых ужо выслалі на радзіму, іншых чакае экстрадыцыя ці дэпартацыя. Масква рэдка адмаўляе Менску і дазваляе затрыманьні на сваёй тэрыторыі беларускім сілавікам. Журналісты выявілі экстрадыцыйныя справы, пра якія ня ведаюць нават праваабаронцы.
