«Вось і надышло лягічнае завяршэньне майго влогу. Калі я пачынаў яго, то разумеў, што, хутчэй за ўсё, так і скончыцца. Вядома, я думаў, што пакараньне будзе разоў у шэсьць менш суровым. Але гэта такая ацэнка маёй дзейнасьці. Аказваецца, выкрываць беззаконьні — гэта асабліва небясьпечнае злачынства», — напісаў Сяргей Ціханоўскі.
Ён зазначае, што ня думаў, што затрыманьне адбудзецца ў траўні 2020-га.
«Ці зьмяніў бы я нешта? Не. А што можна было б зьмяніць? Нават калі б я запісаў нейкі відэазварот, ня факт, што гэта б нешта зьмяніла. Як грамадзянін я выканаў свой грамадзянскі абавязак. Маім дзецям ня будзе сорамна за мяне. І цяпер мяч не на маім баку», — выказаўся палітзьняволены.
«Веру ў перамены да лепшага ў Беларусі», — такімі радкамі скончыў ліст Ціханоўскі.
14 сьнежня блогера Сяргея Ціханоўскага асудзілі на 18 гадоў калёніі. Гэта максымальнае пакараньне, якое атрымаў апанэнт Лукашэнкі за 27 гадоў. Ціханоўскага абвінавацілі па ч. 1 арт. 293 (арганізацыя масавых беспарадкаў), ч. 3 арт. 130 (распальваньне сацыяльнай варажнечы), ч. 2 арт. 191 (перашкоды працы ЦВК), ч. 1 арт. 342 КК (арганізацыя дзеяньняў, што груба парушаюць грамадзкі парадак).
