Сёньня раніцай пра гэта паведаміла ініцыятыва былых беларускіх сілавікоў ByPol. Паводле яе, пры ажыцьцяўленьні высадкі дэсанту расейскіх паветрана-дэсантных войскаў на палігоне «Госкі» ў Горадзенскім раёне адбылося сыходжаньне двух парашутыстаў, у выніку якога закрыўся купал аднаго з парашутаў.
У выніку інцыдэнту загінулі двое вайскоўцаў узброеных сіл Расеі, афіцэр і салдат тэрміновай службы.
«Сёньня на палігоне „Госкі“ ажыцьцяўляецца высадка сумеснага тактычнага паветранага дэсанту ад Сіл спэцыяльных апэрацый Узброеных Сіл Рэспублікі Беларусь і Паветрана-дэсантных войскаў Узброеных Сіл Расейскай Фэдэрацыі ў складзе зводнай батальённай тактычнай групы», — паведаміла раніцай 12 лістапада прэс-служба Мінабароны Беларусі.
Паводле Мінабароны РФ, у сёньняшніх вучэньнях у Беларусі ўдзельнічалі каля 250 расейскіх дэсантнікаў.
Цяпер гэтае расейскае ведамства афіцыйна прызнала гібель двух сваіх вайскоўцаў на вучэньнях у Беларусі.
