Сярод новых палітвязьняў, прызнаных праваабаронцамі:
- Яўген Юшкевіч,
- Сяргей Прус,
- Дзьмітры Бондараў,
- Дзьмітры Сончык,
- Андрэй Разуваеў,
- Ірына Мэльхер,
- Антон Мэльхер,
- Галіна Дзербыш,
- Сяргей Разановіч,
- Любоў Разановіч,
- Павал Разановіч
- Яўген Буйніцкі.
Сярод тых, каго праваабаронцы сёньня прызналі палітвязьнямі, былы сьледчы СК і андроід-распрацоўнік Яўген Юшкевіч.
Яго затрымалі 24 лістапада 2020 году і абвінавацілі ў арганізацыі і падрыхтоўцы дзеяньняў, што груба парушаюць грамадзкі парадак, альбо актыўным удзеле ў іх. Праз паўтара месяца Юшкевіча выпусьцілі пад падпіску аб нявыезьдзе. Другі раз Юшкевіча затрымалі 19 красавіка 2021 году. Яго зьмясьцілі ў СІЗА КДБ. Юшкевіч знаходзіцца пад вартай дагэтуль, пра ягоную справу вядома толькі тое, што яе завялі за нібыта акт тэрарызму.
Таксама статус палітвязьня атрымалі некаторыя фігуранты так званай «справы Аўтуховіча». Сярод іх Сяргей Разановіч, ягоная жонка Людміла і дарослы сын Павал, якія нібыта дапамагалі Аўтуховічу хавацца ад праваахоўнікаў, а таксама пэнсіянэрка Галіна Дзербыш з Абухава Горадзенскай вобласьці, якую затрымалі летась 10 сьнежня. Палітвязьнямі таксама прызналі Ірыну Мэльхер і яе сына Антона, якія таксама праходзяць падазраванымі па справе Аўтуховіча.
Палітвязьнямі прызналі і Сяргея Пруса, Дзьмітрыя Бондарава (асуджаныя паводле ч. 3 арт. 130 КК на 5 гадоў пазбаўленьня волі ў папраўчай калёніі за стварэньне і разьмяшчэньне ў інтэрнэце відэароліка з заклікамі да супрацьпраўных дзеяньняў у дачыненьні да супрацоўнікаў АМАП ГУУС Магілёўскага аблвыканкаму), Дзьмітрыя Сончыка (асуджаны паводле арт. 364 і арт. 369 КК на 5 гадоў пазбаўленьня волі ў калёніі за абразы і пагрозы супрацоўнікам АУС у камэнтарах у адным з тэлеграм-каналаў цягам 2020-2021 гг.), Андрэя Разуваева (асуджаны паводле арт.369 і 295 КК да абмежаваньня волі з накіраваньнем у ПУАТ тэрмінам на 4 гады, накіраваны адбываць пакараньне, за абразу прадстаўніка ўлады і захоўваньне нязначнай колькасьці пораху, які застаўся ў абвінавачанага з часоў занятку паляваньнем), Яўгена Буйніцкага (узяты пад варту ў сувязі з абвінавачаньнем паводле ч. 3 арт. 371 КК за арганізацыю незаконнага перасячэньня мяжы грамадзянамі, якія ратуюцца ад адвольнага палітычна матываванага перасьледу ўладамі Беларусі, якое магло пацягнуць цяжкія наступствы для іх).
Галоўнае пра «справу Аўтуховіча»
Пра затрыманьне «групы Аўтуховіча» дзяржаўныя СМІ расказалі ўвечары 8 сьнежня 2020 году. Паводле іх, за падпаламі дома міліцыянта ў Ваўкавыску і падрывам аўтамабіля супрацоўніка міліцыі ў Горадні стаіць групоўка, якой кіраваў ваўкавыскі прадпрымальнік і былы палітвязень Мікалай Аўтуховіч.
Спачатку Сьледчы камітэт распачаў крымінальную справу паводле ч. 2 арт. 218 КК «Наўмыснае пашкоджаньне маёмасьці, учыненае агульнанебясьпечным спосабам». Потым Генпракуратура перакваліфікавала яго на ч. 1 арт. 289 — «Акт тэрарызму», які прадугледжвае пазбаўленьне волі да 15 гадоў. Некаторым з абвінавачаных інкрымінавалі частку 3 гэтага ж артыкулу, паводле якой пагражала сьмяротнае пакараньне.
Частка 3 артыкулу 289 прадугледзваецца, калі акты тэрарызму «учыненыя арганізаванай групай, або з прымяненьнем аб’ектаў выкарыстаньня атамнай энэргіі, або з выкарыстаньнем радыяактыўных рэчываў або ядзерных матэрыялаў, моцнадзейных, таксычных хімічных або біялягічных рэчываў або спалучаныя з забойствам чалавека».
Разгляд «справы Аўтуховіча» цягнуўся 5 месяцаў. Працэс праходзіў у горадзенскай турме.
Падчас працэсу падсудныя неаднаразова заяўлялі пра ціск і катаваньні з боку сілавікоў і адміністрацыі турмы. Сярод іншага фігуранты заяўлялі, што справа супраць іх сфабрыкаваная.
Працэс вёў судзьдзя Максім Філатаў, які знаходзіцца пад санкцыямі Эўразьвязу. Ён вядомы тым, што асудзіў на 5 год зьняволеньня актывіста зь Бярозаўкі Вітольда Ашурка, які пазьней пры нявысьветленых абставінах загінуў у шклоўскай калёніі.
17 кастрычніка 2022 году Філатаў вынес выракі:
- Мікалаю Аўтуховічу — 25 гадоў зьняволеньня (першыя 5 гадоў у турме, 20 гадоў — у калёніі строгага рэжыму), штраф 1000 базавых велічынь і пазбаўленьне званьня прапаршчыка ў адстаўцы.
- Уладзімеру Гундару — 18 гадоў зьняволеньня ў калёніі ўзмоцненага рэжыму.
- Паўлу Саву — 20 гадоў калёніі ўзмоцненага рэжыму.
- Вользе Маёравай — 20 гадоў калёніі агульнага рэжыму.
- Віктару Сьнегуру — 19 гадоў калёніі строгага рэжыму.
- Галіне Дзербыш —20 гадоў калёніі агульнага рэжыму.
- Любові Разановіч — 15 гадоў калёніі агульнага рэжыму.
- Сяргею Разановічу — 16 гадоў калёніі ўзмоцненага рэжыму.
- Павал Разановіч — 16 гадоў калёніі ўзмоцненага рэжыму.
- Ірыне Мельхер — 17 гадоў калёніі агульнага рэжыму.
- Ірыне Гарачкінай — 6 год і 1 месяц калёніі агульнага рэжыму.
- Антону Мельхеру — 2,5 гады калёніі агульнага рэжыму.
