У францускай амбасадзе Свабодзе паведамілі, што пасол выехаў на патрабаваньне МЗС Беларусі. Ён разьвітаўся з калектывам амбасады.
МЗС Беларусі патлумачыў ад'езд францускага амбасадара так: ён не выказаў гатоўнасьці завяршыць прадугледвжаную міжнародным правам і агульнапрынятай практыкай працэдуру ўступленьня на пасаду, з-за чаго Беларусь апавясьціла Парыж аб заканчэньні дзеяньня сваёй згоды на яго прызначэньне.
Паводле МЗС Беларусі, беларускі амбасадар у Парыжы Ігар Фісенка быў таксама адкліканы ў Менск на кансультацыі.
Завяршэньнем уступленьня амбасадара на пасаду зьяўляецца ўручэньне даверчых лістоў кіраўніку дзяржавы. Нiкаля дэ Лякост толькі ўручыў летась копіі лістоў міністру замежных спраў Беларусі Ўладзімеру Макею, а ад сустрэчы з Аляксандрам Лукашэнкам ухіляўся.
Адной з апошніх сустрэч у Менску ў амбасадара Нiкаля дэ Лякоста была размова з лідэрамі закрытай уладамі Белаурусі кампаніі «Гавары праўду».
Нiкаля дэ Лякост у 2020 годзе перадаў міністру замежных спраў Беларусі Ўладзімеру Макею копіі даверчых лістоў і ўхіляўся ад кантактаў з Лукашэнкам. Францыя, як і іншыя краіны Эўразьвязу, не прызнае Лукашэнку легальна выбраным прэзыдэнтам Беларусі.
Амбасадар Нiкаля дэ Лякост правёў у Беларусі 1 год і 2 месяцы. На гэты момант ніхто з амбасадараў эўрапейскіх краін не ўручаў даверчых лістоў Лукашэнку пасьля выбараў 2020 году.
Паводле кіраўніка Народнага антыкрызіснага кіраваньня Паўла Латушкі, ціск МЗС Беларусі на амбасадара дэ Лякоста зьвязаны з тым, што «Францыя па-ранейшаму ня згодная, каб амбасадар уручаў даверчыя лісты грамадзяніну Аляксандру Лукашэнку. Дэмакратычныя сілы ўдзячныя Францыі за паслядоўную і прынцыповую пазыцыю».
Апрача Нiкаля дэ Лякоста, на патрабаваньне беларускіх уладаў Беларусь пакінулі амбасадары Польшчы Артур Міхальскі і Эўразьвязу Дырк Шубэль, ад новай амбасадаркі ЗША ў Менску Джулі Фішэр МЗС адклікаў агрэман, яна такі і не змагла прыбыць у Беларусь.
