Журналіст беларускай «Камсамолкі» Генадзь Мажэйка спрабаваў паляцець у Варшаву, але расейскія спэцслужбы пасадзілі яго на рэйс у Менск. Пра гэта ў эфіры RTVI заявіў галоўны рэдактар расейскай «Комсомольской правды» Ўладзімір Сунгоркін.
«Неафіцыйна мы ведаем вось што: калі ён прыехаў у аэрапорт Шарамецьева на рэгістрацыю рэйсу ў Варшаву, да яго падышлі супрацоўнікі нашых спэцслужбаў, зноў жа, я кажу „нашы“ неафіцыйна, і сказалі: „Дарагі таварыш Мажэйка Генадзь, вы лічыцеся ў нас у сьпісах непажаданых пэрсонаў і павінны пакінуць Маскву», — апавёў Сунгоркін.
«Як я разумею, ён кажа: „Ахвотна пакіну, вось мой квіток у Варшаву“. „Прабачце, не-не-не, вы павінны пакінуць Маскву і вярнуцца туды, адкуль вы да нас прыбылі. Вы павінны вярнуцца ў Менск, і мы вам у гэтым дапаможам“».
Галоўны рэдактар «КП» адзначыў, што Мажэйку правялі ў самалёт на рэйс у Менск, там яго сустрэлі супрацоўнікі КДБ Беларусі і ўжо даставілі зразумела куды.
Сунгоркін таксама паведаміў, што ў Маскве Мажэйка ня зьвязваўся зь ім.
6 кастрычніка прэсавы сакратар расейскага прэзыдэнта Дзьмітры Пяскоў заявіў, што Крэмль ня мае інфармацыі, дзе і калі быў затрыманы Мажэйка.
«Калі вы хочаце неяк гэта зразумець, то, пэўна, трэба зьвяртацца ў нашыя памежныя службы і гэтак далей», — цытавала яго ТАСС.
З таго часу афіцыйнай інфармацыі ад памежнай ці іншых службаў Расеі наконт затрыманьня Мажэйкі не было.
Генадзь Мажэйка. Таямнічае затрыманьне журналіста
- У канцы верасьня на сайце «Комсомольской правды в Беларуси» зьявілася нататка, дзе адна з аднаклясьніц забітага супрацоўнікамі КДБ праграміста Андрэя Зельцара добра выказалася пра яго. Аўтарам нататкі быў журналіст Генадзь Мажэйка.
- Мажэйку затрымалі ў ноч на 2 кастрычніка, пасьля чаго зьмясьцілі ў ізалятар на Акрэсьціна ў Менску, у яго дома правялі ператрус.
- Пры гэтым дакладна невядома, у якой краіне затрымалі Мажэйку. Беларускія сілавікі сьцьвярджаюць, што зрабілі гэта ў Менску, але ёсьць таксама інфармацыя пра тое, што журналіста «КП» выкралі з Масквы.
- Галоўны рэдактар «Комсомольской правды» Ўладзімір Сунгоркін сказаў, што Генадзя Мажэйку будуць абараняць два адвакаты.
- 4 кастрычніка прэс-сакратар прэзыдэнта Расеі Пуціна Дзьмітрый Пяскоў заявіў, што Крэмль апавясьціў Лукашэнку аб тым, што выступае супраць блякаваньня СМІ на беларускай тэрыторыі, але беларускі бок ня чуе пазыцыі Масквы.
- 5 кастрычніка прадстаўнік «Комсомольской правды» Валянцін Алфімаў паведаміў, што Генадзь Мажэйка застаўся ў ізалятары пасьля 72 гадзін утрыманьня за кратамі, што азначае тое, што да яго ўжытая мера стрыманьня ў выглядзе заключэньня пад варту. Пры гэтым абвінавачаньняў яму ня выставілі.
- 11 кастрычніка Мажэйку выставілі абвінавачаньні ў распальваньні сацыяльнай варажнечы (арт. 130 КК) і абразе прадстаўніка ўлады (арт. 369). Да яго ў жодзінскае СІЗА не пускаюць адваката, спасылаючыся на карантын, а таксама не прымаюць перадачы.
