У законапраекце артыкул 361 Крымінальнага кодэксу Беларусі будзе выкладзены ў новай рэдакцыі — калі закон ухваляць абедзьве палаты, дык за заклікі да санкцый будзе пагражаць пазбаўленьне волі, а ў цэлым пакараньне паводле гэтага артыкулу зробяць больш жорсткім, паведамляе Zerkalo са спасылкай на прэс-службу Палаты прадстаўнікоў.
«Дэпутацкі корпус адгукнуўся на грамадзкую ініцыятыву [...] аб неабходнасьці заканадаўчай заслоны заклікам да санкцый супраць нашай краіны як аднаго з элемэнтаў сучаснай гібрыднай вайны», — гаворыцца ў паведамленьні.
Законапраект «Аб зьмяненьні Крымінальнага кодэксу Рэспублікі Беларусь» 27 верасьня быў унесены ў Палату прадстаўнікоў дэпутатам Алегам Белаконевым.
«У сувязі з распаўсюджваньнем новых спэцыфічных відаў супрацьпраўных паводзінаў і з мэтай узмацненьня прэвэнтыўнага патэнцыялу артыкулу 361 КК праектам Закона ўзмацняецца крымінальная адказнасьць за дзеяньні, накіраваныя на прычыненьне шкоды нацыянальнай бясьпецы Рэспублікі Беларусь, у тым ліку за заклікі, накіраваныя на прымяненьне мераў абмежавальнага характару (санкцый) у адносінах да Рэспублікі Беларусь, фізычных і юрыдычных асоб Рэспублікі Беларусь», — гаворыцца ў апісаньні законапраекту.
Праектам закону таксама прадугледжваецца ўзмацненьне жорсткасьці крымінальнай адказнасьці.
Так, паводле арт. 361 «Заклікі да дзеяньняў, скіраваных на прычыненьне шкоды нацыянальнай бясьпецы Рэспублікі Беларусь», тэрмін максымальнага пакараньня ў шэрагу выпадкаў павялічваецца з 7 да 12 гадоў.
- 26 траўня Аляксандр Лукашэнка заявіў, што падтрымае ўвядзеньне адказнасьці за заклікі да санкцый, калі адпаведнае прапанова будзе зробленая.
