Сястра забітага ў лістападзе 2020 году Рамана Бандарэнкі Вольга Кучарэнка заявіла, што сям’я, якая даведалася пра спыненьне расьсьледаваньня гібелі Рамана з навінаў, працягне змагацца за праўду і будзе падаваць паперы ў афіцыйныя інстанцыі.
«Мы даведаліся гэта з інтэрнэту. Нам ніхто ніякіх паведамленьняў не прысылаў, ніхто не званіў, ніхто нічога не паведамляў», — сказала Вольга Кучарэнка.
Вольга сказала, што не разумее, чаму расьсьледаваньне не правялі па гарачых сьлядах, ня выкарысталі відэа, запісы з камэраў назіраньня, паказаньні сьведак.
«Замест гэтага яны тры месяцы цягнулі, не пачыналі крымінальнай справы, і толкам ніякія сьледчыя дзеяньні не праводзіліся. Адно галаслоўна крычалі, што Рома быў пʼяны і ён сам вінаваты», — адзначыла Вольга Кучарэнка.
«І потым, калі допыты пачаліся, то таксама пачалі дапытваць людзей на той конт, ці быў Рома пʼяны, ці быў у яго пах алькаголю і гэтак далей», — абурылася яна.
«Ствараецца ўражаньне, што яны ў прынцыпе не шукалі гэтых людзей», — адзначыла Вольга.
Яна спадзяецца, што маці Рамана ў Генпракуратуры дадуць падрабязныя тлумачэньні, што было зроблена сьледзтвам.
І што некалі будзе працяг справы.
17 верасьня Генэральная пракуратура заявіла аб прыпыненьні справы наконт гібелі Рамана Бандарэнкі.
Адвакат і маці забітага кансультуюцца, што рабіць цяпер.
«Пісаць заявы, ці я ня ведаю, якія яшчэ магчыма на заканадаўчым узроўні паперы, мы будзем. Бо я лічу, што гэта проста нейкі зьдзек», — сказала Вольга Кучарэнка.
Хто менавіта забіў Рамана Бандарэнку, невядома. Аднак сярод прысутных падчас нападу 12 лістапада 2020 году на запісах з камэраў назіраньня пазналі экс-кіраўніка Фэдэрацыі хакею Беларусі Дзьмітрыя Баскава, неаднаразовага чэмпіёна сьвету ў тайскім боксе і кікбоксінгу Дзьмітрыя Шакуту і прэс-сакратарку Лукашэнкі Натальлю Эйсмант.
Што вядома пра сьмерць Рамана Бандарэнкі
- Невядомыя ў масках пачалі зразаць бел-чырвона-белыя стужкі ў двары на вуліцы Чарвякова ўвечары 11 лістапада.
- Пасьля вэрбальнага канфлікту зь мясцовымі жыхарамі невядомыя пачалі нападаць і біць жыхароў. Каля 22:16 некалькі чалавек забралі і зьвезьлі на бусах, падобных да тых, якімі карыстаюцца сілавікі.
- Паводле непацьверджанай інфармацыі, каля 1,5 гадзіны Бандарэнка знаходзіўся ў Цэнтральным РУУС Менску.
- У 0:05 Раман Бандарэнка паступіў у лякарню хуткай мэдычнай дапамогі зь вялікім ацёкам мозгу, закрытай чэрапна-мазгавой траўмай, субдуральнымі гематомамі, ударамі, абдзірынамі.
- Паводле лекараў, ён быў у затарможаным стане, але ў апэрацыйную яго ўжо прывезьлі ў коме. Апэрацыя цягнулася некалькі гадзін.
- Раман быў у крытычным стане.
- ГУУС Менгарвыканкаму сьцьвярджае, што міліцыя прыбыла на месца толькі пасьля здарэньня. Рамана знайшлі непрытомнага і выклікалі хуткую. Адзін са сьведак здарэньня расказаў Свабодзе, што міліцыя прыяжджала яшчэ тады, калі невядомыя зразалі стужкі, «аднак хутка зьехала, нічога не зрабіўшы».
- Сьледчы камітэт заявіў, што мужчына быў пʼяны. Аднак мэдыкі гэтую заяву абверглі — у крыві Бандарэнкі алькаголю не было.
- 19 лістапада затрымалі журналістку Tut.by Кацярыну Барысевіч і лекара Арцёма Сарокіна. Кацярына Барысевіч была аўтаркай артыкула, дзе гаварылася, што ў крыві загінулага Рамана Бандарэнкі не было алькаголю. Інфармацыю пра гэта ёй перадаў лекар Арцём Сарокін. Пачатак суду над імі прызначаны на 19 лютага.
- 18 лютага 2021 году, на соты дзень пасьля сьмерці Рамана, Генпракуратура паведаміла яго маці Алене Бандарэнцы, што па факце сьмерці яе сына пачалі крымінальную справу.
- 17 верасьня 2021 справу прыпынілі«з прычыны неўстанаўленьня асобы, якая падлягае прыцягненьню ў якасьці абвінавачанага».
