Агенцтва назвала выпрабаваньні пасьпяховымі, удакладніўшы, што пры іх прысутнічалі высокапастаўленыя чыноўнікі краіны.
Паводле заявы КНДР, распрацоўка ракет новага тыпу вялася два гады. Падчас выпрабаваньняў 11 і 12 верасьня ракеты праляцелі паўтары тысячы кілямэтраў, трапілі ў зададзеныя цэлі і ўпалі ў тэрытарыяльныя воды КНДР. Цэнтральнае тэлеграфнае агенцтва Карэі піша, што новыя ракеты — гэта «стратэгічная зброя, якое мае вельмі важнае значэньне». На думку экспэрта, якога цытуе Reuters, пазначэньне ракеты як «стратэгічнай» паказвае на тое, што яна распрацоўваецца пад атамную боегалоўку.
- У сакавіку КНДР заявіла аб выпрабаваньні дзьвюх новых тактычных кіраваных ракет новага тыпу. Экспэрты тады зьвязвалі запускі ракет з падрыхтоўкай да перамоваў з ЗША пасьля зьмены амэрыканскай адміністрацыі. Перамовы Кім Чэн Ына з папярэднікам Байдэна на пасадзе прэзыдэнта ЗША, Дональдам Трампам, зайшлі ў тупік пасьля таго, як паўночнакарэйскі лідэр запатрабаваў адмены санкцый супраць яго краіны ў адказ на частковае згортваньне Пхэньянам ядзернай праграмы.
- У канцы жніўня экспэрты Міжнароднага агенцтва па атамнай энэргіі (МАГАТЭ) у гадавой справаздачы выказалі здагадку, што КНДР магла зноў запусьціць свой экспэрымэнтальны ядзерны рэактар у навукова-даследчым цэнтры ў Ёнбэні.
- У жніўні КНДР разарвала сувязь з Паўднёвай Карэяй у адказ на сумесныя з ЗША ваенныя манэўры. Пхэньян называў вучэньні рэпэтыцыяй уварваньня на Поўнач, а паўднёвакарэйскага прэзыдэнта Мун Чжэ Іна абвінаваціў у «здрадзе».
