Пра гэта паведаміў у Facebook прэм'ер-міністар Польшчы Матэвуш Маравецкі.
Ён дадаў, што пасьля кансультацый зь Літвой, Латвіяй і Эстоніяй, «якіх хваля нелегальнай міграцыі закранула раней», Польшча ўводзіць надзвычайную сытуацыю на мяжы зь Беларусьсю.
«Аднак гэта не азначае, што мы спыняем гуманітарную чыннасьць. Мы разумеем, што людзі, якія туляюцца па беларускі бок мяжы, не вінаватыя ў цынічнай гульні Аляксандра Лукашэнкі», — напісаў прэмʼер-міністар Польшчы.
Польшча ўжо прысылала гуманітарны канвой на беларускае памежжа, але не атрымала згоды Беларусі на перасячэньне мяжы.
- Паблізу памежнай вёскі Горны Уснар на польска-беларускім памежжы заставалася група з двух дзясяткаў мігрантаў з Афганістану. Яны накіроўваліся з Азіі празь Беларусь у Эўразьвяз, але польская памежная варта не прапусьціла іх у краіну. Афганцы пачалі жыць на памежжы, дзе знаходзяцца ўжо некалькі тыдняў.
- 31 жніўня польскія памежнікі прадухілілі 93 спробы незаконнага пранікненьня на тэрыторыю Польшчы, 22 мігрантаў затрымалі. Латвійскія памежнікі спынілі 39 спробаў. Літоўскія — каля дзесяці.
