Як паведамляе AFN, згодна з электронным раскладам на сайце Вярхоўнага суду, працэс пачнецца 19 жніўня. Пазоўнікам выступае Google LLC, пазваным— Міністэрства антыманапольнага рэгуляваньня і гандлю Беларусі.
Zerkalo нагадвае, што праверку наладзілі па заяве заснаванага ў Расеі ТАА «Яндэкс». Яна тычылася магчымага парушэньня антыманапольнага заканадаўства кампаніямі Google LLC (ЗША), Google Commerce Limited (Ірляндыя), Google Ireland Limited (Ірляндыя) на рынку мабільных праграм для прылад на АС Android. Гаворка пра сэрвісы, якія распаўсюджваюцца на тэрыторыі Беларусі.
Міністэрства на падставе праведзенага па скарзе Яндэксу расьсьледаваньня заявіла, што кампанія Google парушыла антыманапольнае заканадаўства Беларусі на рынку крамаў праграмаў для мабільных прыладаў пад кіраваньнем АС Android.
«Па выніках аналізу рынку антыманапольным органам выяўлена, што на гэтым рынку кампанія Google LLC займае дамінантнае становішча са сваёй крамай аплікацый Google Play, якая распаўсюджваецца ў тым ліку на тэрыторыі Рэспублікі Беларусь», — гаварылася ў паведамленьні на сайце Міністэрства антыманапольнага рэгуляваньня Беларусі.
