Цяпер арганізацыя вядзе перамовы з альтэрнатыўнымі гарадамі, якія гатовыя прыняць гэты форум. Новае месца будзе агучанае падчас пасяджэньня выканкаму рады 28-29 ліпеня, гаворыцца на афіцыйным сайце World Athletics.
Рашэньне прынятае па выніках дакладу, падрыхтаванага Сусьветным камітэтам у лёгкай атлетыцы, у якім зроблена выснова: нявызначанасьць вакол дыпляматычных адносінаў і абмежаваньняў міжнародных паездак істотна паўплывае на правядзеньне чэмпіянатаў сьвету ў Менску 23-24 красавіка 2022 году.
Сусьветная лёгкаатлетычная рада шкадуе, што не залежныя ад іх абставіны прымусілі зрабіць такі крок.
У 2017 годзе Менск атрымаў права правесьці камандны чэмпіянат сьвету ў спартовай хадзе, які праз Covid-19 перанесьлі на красавік 2022-га.
Раней праз палітычную нестабільнасьць Беларусь пазбавілі чэмпіянату сьвету ў хакеі, чэмпіянату сьвету ў паўэрліфтынгу, чэмпіянату Эўропу ў велатрэку, этапу Кубку сьвету ў біятлёне ды іншых міжнародных спаборніцтваў.
