Мастак Алесь Пушкін у зьняволеньні заснаваў арт-суполку «Турма» і прыслаў свае малюнкі на волю. ФОТА
Алесь Пушкін пасьля вызваленьня з ЦІП на Акрэсьціна у Менску. 14 жніўня 2020 году.
Мастак Алесь Пушкін у зьняволеньні заснаваў арт-суполку «Турма» і прыслаў свае малюнкі на волю. ФОТА
Вядомы мастак Алесь Пушкін, якога сілавікі затрымалі 30 сакавіка 2021 года ў вёсцы Жылічы Кіраўскага раёну Магілёўскай вобласьці, у горадзенскай турме № 1 заснаваў арт-суполку «Турма». Аб гэтым палітзьняволены паведаміў у адным з лістоў на волю.
У сваім лісьце, які цытуе «Новы час», ён паведаміў, што новая арт-суполка створана для тых мастакоў, хто:
Сядзеў у турме
Жыве ў Беларусі
Размаўляе на беларускай мове.
З-за кратаў Алесь Пушкін дасылае шмат малюнкаў на волю, у якіх распавядае пра свой быт у турме. У Instagram стварылі адмысловую старонку мастака, на якой выкладваюцца гэтыя малюнкі з апісаньнем.
Затрыманьне Алеся Пушкіна ў Палацы Ігнацыя Булгака, в.Жылічы, Кіраўскі раён, 30 сакавіка 2021 года а 16.45. Малюнак Алеся Пушкіна.
29 сакавіка была Астатняя вячэра з рэстаўратарамі ў Жылічах, 30 – арышт, а ў ноч з 30 на 31-га сакавіка 2021 Пушкін быў дастаўлены пад канвоем праз усю Беларусь, праз Наваградак – а гэта блізу 380 км – у Горадню. Малюнак Алеся Пушкіна.
У турме безьліч дзьвярэй і ключоў ад іх. Часам здаецца, што гэта — асноўнае, што ёсьць у турме. Бразгат дзьвярэй, звон ключоў — музыка турмы. Як і мацюкі канваіраў, крыкі тых, каго катуюць, ці выцялі дручком, брэх сабак — гэта асноўныя гукі турмы... І толькі пасьля 22.00 пачынаюцца перастукі з камэры ў камэру, перамовы праз водныя трубкі рукамыйнікаў і ўнітаз — ноч у турме мае сваю музыку гукаў. Малюнак Алеся Пушкіна.
У турме жыве блізу 20 сабак, іх трымаюць і ў вальеры ў дворыку турмы, і трымаюць на павадках, калі зьняволеных водзяць па ўсіх трох паверхах турмы — каб яны злосна і гучна брахалі на праходзячых паўз іх зэкаў.
Малюнак Алеся Пушкіна. Вясна ў турме.
Мастака Алеся Пушкіна падазраюць па ч.3 арт. 130 КК (распальваньне варажнечы). Цяпер яго перавялі ў СІЗА-1 у Менску. Ягоны адрас : Пушкіну Аляксандру Мікалаевічу, СІЗА-1. 220030, г. Менск, вул. Валадарскага, 2.
