Як адзначае сайт «Права на абарону», падставай для пераатэстацыі Валера Зінкевіча стаў леташні фатаздымак на ягонай старонцы ў інстаграме з подпісам: «Ад апошніх дзён проста захоплівае дух! Посьпеху нашай любімай Беларусі».
На думку кваліфікацыйнай камісіі ў пытаньнях адвакацкай дзейнасьці, выказваньне ўласнай пазыцыі «не спрыяе павышэньню прэстыжу і аўтарытэту адвакатуры ў грамадзтве».
Валер Зінкевіч мае стаж працы ў адвакатуры больш за 20 гадоў, доўгі час працаваў у бюро «Конан і партнэры», кіраўніком якога зьяўляўся ўжо пазбаўлены ліцэнзіі адвакат Максім Конан.
Сьвятлана Халаловіч адпрацавала ў адвакатуры 19 гадоў, летась брала ўдзел у бясплатным дыстанцыйным кансультаваньні мэдычных работнікаў, якія непасрэдна працавалі з хворымі на COVID-19.
Ад пачатку году на пазачарговую пераатэстацыю выклікалі многіх адвакатаў, якія абаранялі палітвязьняў або ўдзельнічалі ў палітычных працэсах.
У выніку адвакацкіх ліцэнзій пазбавіліся Людміла Казак, Сяргей Зікрацкі, Аляксандар Пыльчанка, Міхаіл Кірылюк, Канстанцін Міхель ды іншыя юрысты.
