У новым санкцыйным сьпісе 29 чалавек і 7 юрыдычных асобаў, піша Юзьвяк.
Ён дадае, што рашэньне да афіцыйнай публікацыі яшчэ маюць ухваліць міністры навакольнага асяродзьдзя краінаў Эўразьвязу. Паводле Юзьвяка, гэта мае адбыцца ў чацьвер.
На пачатку кастрычніка Эўразьвяз узгадніў санкцыі да 40 чалавек, адказных за фальсыфікацыю прэзыдэнцкіх выбараў у Беларусі і жорсткія рэпрэсіі супраць пратэстоўцаў. Аляксандра Лукашэнку ў санкцыйны сьпіс тады ня ўнесьлі. У дадатковым сьпісе Эўразьвязу, прынятым 6 лістапада, наступныя асобы:
- Аляксандар Лукашэнка
- Віктар Лукашэнка — памочнік прэзыдэнта ў нацыянальнай бясьпецы
- Ігар Сергеенка — кіраўнік адміністрацыі прэзыдэнта
- Іван Тэртэль — старшыня КДБ
- Раман Мельнік — начальнік Галоўнай управы аховы правапарадку і прафіляктыкі МУС
- Іван Наскевіч — старшыня Сьледчага камітэту
- Аляксей Волкаў — былы першы намесьнік старшыні Сьледчага камітэту, цяпер старшыня Дзяржаўнага камітэту судовых экспэртызаў
- Сяргей Аземша — намесьнік старшыні Сьледчага камітэту
- Андрэй Смаль — намесьнік старшыні Сьледчага камітэту
- Андрэй Паўлючэнка — кіраўнік Апэратыўна-аналітычнага цэнтру пры прэзыдэнту
- Ігар Бузоўскі — намесьнік міністра інфармацыі
- Натальля Эйсмант — прэс-сакратарка прэзыдэнта
- Сяргей Зубкоў — камандзір групы «Альфа» (спэцназ)
- Андрэй Раўкоў — былы дзяржаўны сакратар Савету бясьпекі
- Пётра Міклашэвіч — старшыня Канстытуцыйнага суду
Прычынамі санкцыяў сталі рэпрэсіі і запалохваньне мірных дэманстрантаў пасьля прэзыдэнцкіх выбараў 2020 году, у прыватнасьці — адвольныя арышты і жорсткае абыходжаньне, у тым ліку катаваньні, а таксама запалохваньне журналістаў і гвалт над імі. Таксама — парушэньні правілаў прэзыдэнцкіх выбараў, невыкананьне асноўных міжнародных стандартаў справядлівасьці і празрыстасьці выбараў, фальсыфікацыя вынікаў выбараў, адхіленьне на ўяўных падставах ад выбарчай кампаніі апазыцыйных кандыдатаў, стварэньне абмежаваньняў назіральнікам на выбарчых участках, перадузятае фармаваньне выбарчых камісіяў.
