«Рэпартэры бязь межаў» назвалі Беларусь самай небясьпечнай у Эўропе краінай для журналістаў і далі 15 рэкамэндацый, як спыніць беспрэцэдэнтныя рэпрэсіі. У прыватнасьці, яны заклікалі Эўрапейскі Зьвяз замарозіць усе выплаты Беларусі па лініі фінансавай дапамогі, пакуль там парушаюцца правы чалавека.
За чатыры месяцы ў Беларусі
- зафіксавалі 449 выпадкаў парушэньня свабоды слова,
- арыштавалі 368 журналістаў,
- палову арыштаваных асудзілі,
- 80 журналістаў зьняволілі на тэрмін, ня меншы за тры дні,
- 7 журналістаў прыцягнулі да крымінальнай адказнасьці або атрымалі пагрозы такога перасьледу,
- 62 журналісты сталі ахвярамі гвалту, жорсткага абыходжаньня і нават катаваньняў падчас утрыманьня пад вартай.
Каб спыніць гэтыя рэпрэсіі і закласьці новыя асновы свабоды слова ў Беларусі, «Рэпартэры бязь межаў» далі рэкамэндацыі беларускім уладам і міжнародным інстанцыям.
Сярод патрабаваньняў да беларускіх уладаў,
- гарантаваць бясьпеку журналістам, асудзіць вінаватых у парушэньні свабоды слова, жорсткім абыходжаньні, гвалце і катаваньнях;
- спрасьціць акрэдытацыю замежных журналістаў;
- спыніць цэнзуру і блякаваньне навінавых сайтаў і блогаў;
- вярнуць незалежным выданьням доступ да друку і распаўсюду;
- скасаваць абавязак весьці ўлік і раскрываць зьвесткі камэнтатараў;
- спыніць крымінальны і адміністрацыйны перасьлед журналістаў, перагледзець прысуды;
- паспрыяць візыту ў Беларусь дакладчыка АБСЭ і экспэртаў ААН;
- прызнаць юрысдыкцыю Эўрапейскага суду ў правах чалавека.
Да эўрапейскіх інстытуцый «Рэпартэры бязь межаў» зьвярнуліся з заклікам падтрымліваць журналістаў і свабоду слова ў Беларусі. А таксама ўвесьці санкцыі супраць беларускіх уладаў і замарозіць фінансавую дапамогу.
У рэйтынгу свабоды прэсы «Рэпартэраў бязь межаў» Беларусь займае 153-е месца з 180.
