Для Ільлі Салея, юрыста штабу Віктара Бабарыкі і аднаго з адвакатаў сябра прэзыдыюму Каардынацыйнай рады для ўрэгуляваньня палітычнага крызісу Марыі Калесьнікавай, 11 верасьня абралі меру стрыманьня ў выглядзе ўзяцьця пад варту.
Як паведаміў БелаПАН яго бацька і адвакат Васіль Салей, сёньня скончыліся 72 гадзіны з моманту затрыманьня сына, пасьля якіх мае быць прынята рашэньне вызваліць яго альбо ўзяць пад варту.
Ільля Салей мае статус падазраванага ў крымінальнай справе паводле ч. 3 арт. 361 Крымінальнага кодэксу («Заклікі да дзеяньняў, скіраваных на прычыненьне шкоды нацыянальнай бясьпецы Рэспублікі Беларусі»).
«З ізалятару часовага ўтрыманьня на Акрэсьціна яго пераводзяць у СІЗА на вуліцы Валадарскага, — сказаў Салей-старэйшы. — Там ён будзе чакаць абвінавачаньня».
Ільлю Салея быў затрымалі раніцай 9 верасьня, у яго кватэры правялі вобшук. У гэты ж дзень у Менску па той жа крымінальнай справе затрымалі сябра прэзыдыюму Каардынацыйнай рады юрыста Максіма Знака. Тады стала таксама вядома, што затрыманая напярэдадні на беларуска-ўкраінскай мяжы Марыя Калесьнікава знаходзіцца ў СІЗА № 1 у Менску. Увечары з санкцыі пракурора Калесьнікавай і Знаку абралі мера стрыманьня ў выглядзе ўзяцьця пад варту.
Справу паводле ч. 3 арт. 361 КК распачалі па факце стварэньня Каардынацыйнай рады, сфармаванай з ініцыятывы былой кандыдаткі ў прэзыдэнты Сьвятланы Ціханоўскай.
Беларускія праваабарончыя арганізацыі прызналі Марыю Калесьнікаву, Максіма Знака і Ілью Салея палітычнымі зьняволенымі.
