Старшыня Горадзенскага гарвыканкаму Мечыслаў Гой зьвярнуўся да жыхароў гораду, прыгразіўшы «законнымі захадамі» тым, хто парушае грамадзкі парадак.
«Апошнія падзеі паказалі, што мы можам страціць разуменьне і згоду ў грамадзтве, — адзначыў начальнік гораду. — Наша імкненьне да дыялёгу, пацьверджаньне неабыякавасьці да лёсу Горадні і яе жыхароў відавочнае. Падтрымліваючы неад’емнае права на выказваньне сваёй грамадзянскай пазыцыі, лічым, што яго рэалізацыя павінна адбывацца ў цывілізаваных рамках дзейнага заканадаўства».
Як заявіў Мечыслаў Гой, асобныя ўдзельнікі «пратэставых мерапрыемстваў» заклікаюць да страйкаў. Акрамя таго, апускаюцца да абразаў, запалохваньняў і пагрозаў фізычнай расправы пэдагогам, кіраўнікам прадпрыемстваў, сем’ям супрацоўнікаў праваахоўных органаў, вайскоўцаў і проста людзей, якія маюць іншы пункт гледжаньня.
«Мы просім усіх жыхароў гораду ўзважана і канструктыўна падыходзіць да рэалізацыі свайго права на свабоднае выказваньне думкі. Не паддавацца на правакацыі і ананімныя заклікі да супрацьпраўных дзеяньняў, здольных нанесьці шкоду працоўным правам і законным інтарэсам грамадзянаў», — заклікаў кіраўнік Горадзенскага гарвыканкаму.
Зьвяртаючыся да гараджанаў, ён агучыў шэраг патрабаваньняў.
- Выконваць закон аб масавых мерапрыемствах
- Адмовіцца ад ціску на сем’і горадзенцаў, якія выконваюць свой службовы абавязак
- Спыніць распаўсюджваць праз сацыяльныя сеткі хлусьлівую інфармацыю пра цяперашнія падзеі
- Выконваць права на адпачынак горадзенцаў у цішыні, на грамадзкі парадак і бясьпеку.
Чыноўнік прыгразіў, што ўлады пакідаюць за сабой права прыняць законныя захады да людзей, якія парушаюць гэтыя патрабаваньні.
