Папулярны сярод моладзі сьпявак Ціма Беларускіх падтрымаў на Instagram мірных пратэстоўцаў, якія ўчора прайшлі вуліцамі сталіцы і іншых гарадоў, а потым сабраліся на галоўных плошчах і выказалі нязгоду з вынікамі прэзыдэнцкіх выбараў.
«Аднойчы я ўзяў сабе псэўданім у гонар цэлай краіны, у імя таго, каб як мага больш людзей здолелі даведацца пра такое цудоўнае месца, як Рэспубліка Беларусь. Сёньня, са сьлязьмі на вачах, я пішу гэты пост з трыма гучнымі ГАНАРУСЯ ГАНАРУСЯ ГАНАРУСЯ», — напісаў ён.
16 жніўня каля стэлы «Менск — горад-герой» сабраліся больш за сто тысяч чалавек. Прыхільнікі пераменаў занялі ўсю тэрыторыю каля стэлы, ля музэю Вялікай айчыннай вайны, на прылеглых вуліцах, праспэкце Пераможцаў і ў парках, прычым людзі не выходзілі на праезную частку.
Паводле розных падлікаў, на вуліцы Менску выйшла да паўмільёна прыхільнікаў пераменаў. Раніцай на плошчы Незалежнасьці адбыўся мітынг у падтрымку Аляксандра Лукашэнкі, на якім выступіў ён сам.
