На дэбатах, якія паказалі па дзяржаўнай тэлевізіі 30 ліпеня, выступілі кандыдаты Андрэй Дзьмітрыеў і Сяргей Чэрачань. Аляксандра Лукашэнку прадстаўляў Алег Гайдукевіч.
Сьвятлана Ціханоўская ад тэледэбатаў адмовілася, не прысутнічалі і яе давераныя асобы. Таксама ад дэбатаў адмовілася Ганна Канапацкая. Што сказалі ўдзельнікі дэбатаў — тэзісна.
Андрэй Дзьмітрыеў
- Важна правесьці новыя выбары праз год.
- Беларусы маюць права мірна і спакойна абраць новага прэзыдэнта, ніхто ня хоча Майданаў
- Беларусы стаміліся ад такога стаўленьня да сябе.
- Калі беларусы не абяруць новага прэзыдэнта, то ў наступныя гады ўсё больш беларусаў будуць набываць квіткі ў адзін канец.
- Вырашыць праблемы са стратнымі прадпрыемствамі, кумаўством. Трэба працаваць над новай Канстытуцыяй, якая дазволіць абіраць мэраў.
- Стварыць умовы для сярэдняга і малога бізнэсу і прыбраць натоўп кантралёраў.
Андрэй Дзьмітрыеў гатовы працаваць ва ўрадзе ці міністэрстве, але толькі ў камандзе новага прэзыдэнта. Ён заклікаў галасаваць толькі 9 жніўня і толькі за альтэрнатыўных кандыдатаў, не ўдакладняючы, за каго.
Сяргей Чэрачань
- Чэрачань назваў сваю каманду камандай рэфарматараў, якая хоча зрабіць Беларусь краінай, дзе хочацца жыць.
- Улада не апраўдала дадзены ёй давер. Чэрачань заклікаў беларусаў прагаласаваць за альтэрнатыўнага кандыдата, за каго менавіта — не ўдакладніў.
- У Беларусі слаба разьвіваецца малы і сярэдні бізнэс, праз палітычную сытуацыю ў краіну не прыходзяць інвэстыцыі з замежжа.
- У Беларусі няма дэмакратычных выбараў, да выбараў дапушчаныя ня ўсе кандыдаты, не вядзецца належнае назіраньне. Чэрачань спытаў у Лукашэнкі, калі ў Беларусі будуць забясьпечаны дэмакратычныя выбары.
- Большасьці зараз абсалютна ўсё роўна, якая праграма, якія рэформы і якая будучыня чакае нашую краіну. І я добра разумею гэтых людзей. Улада зрабіла ўсё, каб страціць давер. Галоўнае пытаньне, якое лунае ў паветры, — як зьмяніць уладу. На любую, але іншую.
Алег Гайдукевіч
- Выбары павінны быць барацьбой праграм і дыскусій, умацоўваць краіну і кансалідаваць усіх беларусаў.
- На гэтых выбарах мы мала гаворым пра праграмы і ідэалёгіі, шэраг палітычных сілаў прапанавалі беларусам просты, але катастрафічны варыянт: памяняць уладу, а потым разабрацца.
- Замест вырашэньня задач, якія стаяць перад Беларусьсю, нам прапануюць прызначаць новыя выбары.
- Пазыцыя Лукашэнкі вядомая.
- Выбары мы праводзім для сябе, а не для Эўропы.
- Сфальсыфікаваць нічога немагчыма.
- За 26 гадоў мы [беларусы] пабудавалі краіну, а Лукашэнка «ўратаваў краіну».
Алег Гайдукевіч запэўніў, што «сам захацеў прыйсьці на дэбаты ад імя Лукашэнкі». Ён заклікаў вырашаць лёс краіны на выбарчых участках і «галасаваць за моцную краіну».
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
