Беларуская армія ды іншыя сілавыя структуры рыхтуюцца да прадухіленьня масавых беспарадкаў, заявіў дзяржсакратар Савету бясьпекі, былы міністар абароны Андрэй Раўкоў падчас наведваньня Аляксандрам Лукашэнкам 103-й Віцебскай асобнай гвардзейскай паветрана-дэсантнай брыгады 16 ліпеня. БелаПАН перадае яго выказваньні з шэрагу дзяржаўных тэлеканалаў.
«Уся тая падрыхтоўка на падставе дасягненьня мэтаў ваеннай дактрыны і нацэленая ў вайсковых частках, у першую чаргу сілаў спэцыяльных апэрацыяў, сухапутных войскаў і іншага віду Узброеных сілаў, на тое, каб быць гатовымі да любога разьвіцьця становішча», — сказаў Раўкоў.
Паводле яго, войны апошніх гадоў, як правіла, пачыналіся «з вуліцы, з плошчы».
«І вось гэтая плошча – вазьміце Тахрыр (у Эгіпце), вазьміце Сырыю, вазьміце радыкальныя дзеяньні на Ўкраіне, — разважаў Раўкоў. — Бо да гэтых падзеяў, па вялікім рахунку, Захад рыхтаваў Украіну гадоў дваццаць, а Расея спрабавала нешта супрацьпаставіць гэтаму. Ну вось і пайшлі яны па такім шляху, ня вельмі добрым. Але ўсё гэта здарылася. Для нас гэта ўрок».
«Ня трэба распускаць соплі і думаць пра тое, што вось нехта сказаў, што войска будзе супраць народу, армія будзе страляць супраць народу, — сказаў Раўкоў. — Я ўжо, таварыш прэзыдэнт, ад душы скажу, але мы павінны дакладна разумець: мы сілавы інструмэнт.
І ня толькі Узброеныя сілы, але і міліцыя, і АМАП, і органы ўнутраных спраў, унутраныя войскі і памежнікі, і іншыя сілавыя структуры. і наша задача — не дапусьціць гібелі дзяржавы, не дапусьціць кровапраліцьця ў народзе. Не дапусьціць. Калі мы гэта дапусьцім, значыць, мы прайгралі бой».
«А ўсё гэта пачнецца, калі раптам пачнецца, гэта будзе таемна, ціха, арганізацыя масавых беспарадкаў, што вы цяпер, я ўпэўнены, бачыце, назіраеце, а з улікам цяперашняга сьвету, XXI стагодзьдзя, вядома ж, магчымасьці ў арганізацыі, бунтаваньні насельніцтва, бунтаваньні тых людзей, якія займаюць пэўныя нішы ў соцыюме нашай дзяржавы, вядома ж, гэта можа прывесьці да масавых беспарадкаў. І натуральна, армія як сілавы інструмэнт, рука дзяржавы, яна ніколі ня дасьць магчымасьці гэтаму пачатку канфлікту», — падкрэсьліў дзяржсакратар Савету бясьпекі.
«А канфлікт можа затым перарасьці ў што заўгодна, — заявіў ён. — Тым больш у гэтым завязаныя вонкавыя сілы, гэта ні для кога не сакрэт, гэта відаць няўзброеным вокам. Таму наша задача – выканаць, у той момант, калі гэта спатрэбіцца. Натуральна, з унутранымі войскамі, зь міліцыяй, з іншымі сілавікамі, якія будуць першымі выконваць задачы для прадухіленьня якіх-небудзь тэрарыстычных праяў, масавых беспарадкаў і таму падобнае. Мы да гэтага рыхтаваліся, рыхтуемся і будзем рыхтавацца. Ну і ў выканаўчы момант, таварыш прэзыдэнт, калі неабходна, мы выканаем».
Прэзыдэнцкія выбары — 2020 у Беларусі. Што важна ведаць
- Шостыя ў гісторыі сувэрэннай Беларусі выбары прэзыдэнта прызначаныя на нядзелю, 9 жніўня 2020 году.
- 65-гадовы Аляксандар Лукашэнка кіруе дзяржавай 25 гадоў. Ніводныя прэзыдэнцкія выбары (2001, 2006, 2010, 2015), апроч першых (1994 год), не прызналі свабоднымі і справядлівымі на міжнародным узроўні.
- Старшыня ЦВК Лідзія Ярмошына адхіліла прапановы праваабаронцаў аб дыстанцыйных прэзыдэнцкіх выбарах у час эпідэміі COVID-19, бо «часу для прыняцьця гэтых захадаў ужо няма». Лукашэнка ня бачыў падставаў пераносіць выбары праз пандэмію.
- ЦВК зарэгістраваў 15 ініцыятыўных груп з 55 заявак.
- Аўтару YouTube-канала «Страна для жизни» Сяргею Ціханоўскаму Цэнтральная выбарчая камісія адмовіла ў рэгістрацыі ініцыятыўнай групы, бо ён адбываў 15 сутак арышту і ня мог асабіста падаць дакумэнты. Тады сваю ініцыятыўную групу ў ЦВК заявіла жонка блогера Сьвятлана Ціханоўская.
- 29 траўня на перадвыбарчым пікеце жонкі затрымалі Ціханоўскага і яшчэ 9 чалавек. Лукашэнка казаў пра акалічнасьці затрыманьня за 4 гадзіны да таго, як яно адбылося.
- 11 чэрвеня ў «Белгазпрамбанку» і шэрагу іншых кампаній прайшлі ператрусы. У Камітэце дзяржкантролю заявілі, што завялі крымінальныя справы аб легалізацыі сродкаў, атрыманых злачынным шляхам, і аб ухіленьні ад сплаты падаткаў у асабліва буйным памеры. Старшыня КДК Іван Тэртэль сьцьвярджаў, што да гэтых спраў мае дачыненьне патэнцыйны кандыдат у прэзыдэнты Віктар Бабарыка. Роўна за 4 гадзіны да заявы Дзяржкантролю Аляксандар Лукашэнка расказаў пра акалічнасьці «справы „Белгазпрамбанку“».
- 18 чэрвеня Віктара Бабарыку і яго сына, кіраўніка ініцыятыўнай групы Эдуарда Бабарыку затрымалі.
- 14 ліпеня ЦВК зарэгістраваў кандыдатамі ў прэзыдэнты Аляксандра Лукашэнку, Сьвятлану Ціханоўскую, Ганну Канапацкую, Андрэя Дзьмітрыева і Сяргея Чэрачня. Не зарэгістравалі Віктара Бабарыку і Валера Цапкалу.
- Ад пачатку выбарчай кампаніі праваабаронцы налічылі больш за 1300 затрыманых: удзельнікі «ланцугоў салідарнасьці», сябры ініцыятыўных груп, актывісты, палітыкі, блогеры, журналісты і проста мінакі на вуліцы. Сотні чалавек пакаралі адміністрацыйнымі арыштамі і аштрафавалі.
