Рэйтынг падтрымкі прэзыдэнта ЗША Дональда Трампа павысіўся, нягледзячы на жорсткую крытыку яго паводзінаў падчас пандэміі. Пра гэта паведамляе брытанская Financial Times.
Пандэмія каранавірусу павысіла рэйтынгі практычна кожнага з лідэраў 10 найбуйнейшых дэмакратый у сярэднім на 9 адсоткавых пунктаў. Такую выснову зрабіла брытанская газэта на падставе аналізу апытаньняў у розных краінах сьвету.
Каранавірус у Беларусі і ў сьвеце. Як разьвіваюцца падзеі >>
Папулярнасьць прэм’ер-міністра Вялікабрытаніі Борыса Джонсана павысілася больш, чым у кожнага зь іншых лідэраў.
Джэф Картрайт, віцэ-прэзыдэнт сацыялягічнага цэнтру Morning Consult, сказаў, што натуральна, што рэйтынгі лідэраў будуць узрастаць, калі яны знаходзяцца ў цэнтры ўвагі падчас крызісу. «Ад таго, як пандэмія будзе разьвівацца, і ад яе канчатковага выніку, будзе залежыць, ці захаваецца гэтая падтрымка» — сказаў ён.
Рэйтынг падтрымкі прэмʼера Джонсана павысіўся на больш чым 25 адсоткавых пунктаў з пачатку 2020 года, ператварыўшы яго ў аднаго з самых папулярных лідэраў у дэмакратычным сьвеце.
Пасьля Джонсана ў найбольшай ступені павялічыліся рэйтынгі прэмʼер-міністра Індыі Нарэндра Модзі і прэзыдэнта Мэксыкі Андрэса Мануэля Лопэса Абрадора.
З пачатку году рэйтынг ухваленьня Дональда Трампа вырас на 5 адсоткавых пунктаў, гэта адзін з самых высокіх паказьнікаў яго рэйтынгу з часу, калі ў студзені 2017 году ён стаў прэзыдэнтам ЗША.
Financial Times адзначае, што прадстаўнікі Дэмакратычнай партыі ЗША будуць асабліва засмучаныя тым, што рэйтынг Трампа павялічыўся, нягледзячы на яго крокі, якія некаторыя лічаць памылковымі, а таксама нягледзячы на той чыньнік, што ў ЗША зафіксавана больш выпадкаў захворваньня на каранавірус, чым у любой іншай краіне сьвету.
Прэзыдэнт ЗША першапачаткова ставіў пад сумнеў небясьпеку захворваньня, параўноўваючы яго з сэзонным грыпам, яшчэ два тыдні таму ён адмаўляўся дамагацца ажыцьцяўленьня прынцыпаў сацыяльнай дыстанцыі. Дэмакратка Нэнсі Пэлосі, сьпікерка Палаты прадстаўнікоў ЗША заявіла, што прамаруджваньне з рашучымі дзеяньнямі з боку Трампа каштавала жыцьцяў амэрыканцаў.
Мухамэд Юніс, галоўны рэдактар выданьня сацыялягічнага цэнтру Gallup падкрэсьліў, што рэйтынг прэзыдэнта Трампа павялічыўся ня толькі сярод рэспубліканцаў, але і сярод дэмакратаў і незалежных выбаршчыкаў.
Падчас крызісу павялічыліся таксама рэйтынгі канцлера Нямеччыны Ангелы Мэркель і прэзыдэнта Францыі Эманюэля Макрона.
Financial Times прыгадвае, што пасьля тэракту 11 верасьня 2001 году рэйтынг тагачаснага прэзыдэнта ЗША Джорджа Буша-малодшага складаў 84%. І толькі праз два гады балянс станоўчых і адмоўных ацэнак Буша схіліўся ў бок адмоўных ацэнак.
«Прыклад Джорджа Буша паказвае, што такія рэчы доўжацца і доўжацца даволі доўга, — сказаў Цім Бэйл, прафэсар палітычных навук ва ўнівэрсытэце каралевы Марыі — Але нічога не доўжыцца вечна».
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
