Падчас рабочай паездкі ў Смалявіцкі раён Аляксандар Лукашэнка агучыў актуальныя лічбы па выпадках каранавірусу ў Беларусі, паведамляе тэлеканал АНТ.
Паводле яго, на 3 красавіка ў 351 чалавека выявілі каранавірус, зь іх 46 пацыентаў ужо выпісалі са шпіталяў. 16 хворых цяпер знаходзяцца на апаратах штучнай вэнтыляцыі лёгкіх.
«305 чалавек па ўсёй краіне — гэта мізэр! Мы іх лечым, 16 толькі на штучнай вэнтыляцыі лёгкіх, і то гэта не праблема. Шуміху паднялі з нагоды чацьвярых памерлых! Аднаго правяраем, у траіх пацьверджаны каранавірус. Я спытаў учора ў Шарсьнёва з нагоды апошняга выпадку сьмерці. Ён сказаў: „А як можна жыць? 135 кг вагі! “ Сэрца амаль не працуе, гэта баліць, то баліць, цэлы букет хваробаў. Вірус атакуе слабых», — пракамэнтаваў Лукашэнка сытуацыю з каранавірусам у Беларусі.
Міністэрства аховы здароўя Беларусі пакуль новых лічбаў інфікаваных каранавірусам і хворых станам на 3 красавіка не давала.
Што трэба ведаць пра новы каранавірус, які выклікае COVID-19
- Невядомы раней вірус выявілі ў кітайскім горадзе Ўхань у сьнежні 2019 году.
- Афіцыйнай назвай хваробы ад новага каранавірусу з Кітаю стала COVID-19 (coronavirus disease).
- Сусьветная арганізацыя здароўя рэкамэндуе трымацца далей ад людзей, якія чхаюць і кашляюць, добра мыць рукі, ня есьці дрэнна апрацаванае (недасмажанае або недаваранае) мяса, абмежаваць сацыяльныя кантакты.
- Сусьветная арганізацыя здароўя абвясьціла распаўсюд каранавіруснай інфэкцыі COVID-19 у сьвеце пандэміяй.
- Праявы каранавірусу падобныя да іншых вострых вірусных захворваньняў. Ён суправаджаецца павышанай тэмпэратурай, ліхаманкай і цяжкасьцямі дыханьня, у хворага могуць зьяўляцца кашаль, млявасьць, пагаршэньне агульнага стану; можа выклікаць бранхіт і пнэўманію.
- Каранавірусы — сямейства з больш як 30 вірусаў, якія былі ўпершыню выдзеленыя ў 1965 годзе. Паражаюць людзей, свойскіх жывёлаў, сьвіней, буйную рагатую жывёлу, птушак і здольныя правакаваць пашкоджаньне дыхальнай сыстэмы, страўнікава-кішачнага тракту, нэрвовай сыстэмы. Вядома, што інфэкцыя перадаецца ад чалавека да чалавека. Сярод сымптомаў — гарачка, кашаль і цяжкае дыханьне. Паколькі гэтыя сымптомы падобныя да многіх іншых рэсьпіратарных захворваньняў, неабходны дадатковы скрынінг.
Найважнейшыя пытаньні і адказы пра каранавірус
Беларускія мэдыкі, якія загінулі падчас пандэміі COVID-19. СЬПІС ПАМЯЦІ
