Стваральнік цэнтру «100 балаў» Яўген Лівянт лічыць, што на беларускім тэставаньні па матэматыцы ў абітурыентаў прапушчаны шэраг тэмаў, а само тэставаньне патрабуе ўдасканальваньня.
Рэпэтытар Яўген Лівянт прааналізаваў, якія тэмы сустракаюцца на ўступных экзамэнах у Беларусі, Украіне і Расеі — і заўважыў, што на беларускім цэнтралізаваным тэставаньні няма шэрагу тэмаў, якія ёсьць у іншых краінах.
Так, паводле рэпэтытара, у Беларусі няма задачаў на наступныя тэмы:
- Вэктары;
- Вытворныя;
- Інтэгралы;
- Тэорыя імавернасьці, камбінаторыка;
- Статыстыка;
- Геамэтрычныя задачы на доказы.
Ва Ўкраіне з гэтага пераліку няма задачаў толькі па статыстыцы, у Расеі — па вэктарах ды інтэгралах.
«Я палез глядзець тэст па матэматыцы ва Ўкраіне і быў уражаны якасьцю. У Расеі таксама добрыя тэсты, але я пра гэта ведаў раней. Яны ад нас адышлі як па арганізацыі прадметаў, так і па зьмесьце. А калісьці ў нас было лепш. У Расеі яшчэ да 2014 году можна было сьпісаць. Кантроль за абітурыентамі, сакрэтнасьць — у нас гэтыя пытаньні былі вырашаныя даўно. А вось зь якасьцю праблемы. У нас колькасьць тэмаў скарачаецца кожны год, у нас архаічная частка А (дзе трэба паставіць крыжыкі) і частка Б (дзе трэба ўводзіць адказы). У Расеі ўжо адмовіліся ад часткі, дзе можна выбраць адказы», — кажа Яўген Лівянт Свабодзе.
«У нашых арганізатараў тэставаньня няма лёгікі»
Рэпэтытар дадае, што і ў Расеі, і ва Ўкраіне ёсьць заданьні, дзе трэба напісаць рашэньне. У Беларусі такога няма. Па замежнай мове ў Расеі і ва Ўкраіне ёсьць тэсты на аўдыяваньне і вымаўленьне.
«У нашых арганізатараў тэставаньня няма лёгікі, гэта проста недзеяздольнасьць. Часткі гэтых тэмаў няма і ў беларускай школьнай праграме па матэматыцы. Частка ёсьць для школ з паглыбленым вывучэньнем. Калі мы возьмем польскі ўступны экзамэн па матэматыцы, то альгебра будзе нашмат больш складаная, чым у Расеі ды Ўкраіне. Я б не шукаў лёгікі ў нашых чыноўнікаў ад адукацыі, яе проста няма», — падсумоўвае Яўген Лівянт.
Цяпер у Беларусі праходзіць цэнтралізаванае тэставаньне, якое служыць уступным экзамэнам ва ўнівэрсытэты.
