На сайце Petitions.by апублікаваны адказ на зварот з патрабаваньнем «спыніць апаганьваньне народнага мэмарыялу Курапаты» і прад'явіць дакумэнты, якія давалі б падставу зносіць крыжы.
Супраць «крыжалому» ў Курапатах за два з паловай тыдні падпісаліся больш як 2400 карыстальнікаў.
У адказе, датаваным 19 красавіка, міністар лясной гаспадаркі Віталь Дрожжа называе знос крыжоў «дэмантажом асобных спаруд» і «дэмантажом незаконна пастаўленых аб’ектаў», а таксама «чарговым этапам добраўпарадкаваньня».
Дрожжа сьцьвярджае, што «спаруды» зносілі адпаведна праекту зоны аховы мэмарыялу і на падставе пастановы Савету Міністраў аб правілах добраўпарадкаваньня мэмарыялаў. Міністар таксама спасылаецца на ўзгадненьне Міністэрствам культуры работ па ўсталяваньні дзяржаўнага помніка ў мэмарыяле – нібыта дазвол распаўсюджваецца і на знос крыжоў.
«Трэба заўважыць, што спэцыялістамі ДСЛГУ „Бараўлянскі спэцлясгас“ быў зроблены дэмантаж выключна незаконна пастаўленых спарудаў (крыжоў), — піша Дрожжа. — Разам з тым усе спаруды, пастаўленыя з выкананьнем заканадаўства, захаваныя».
Якія крыжы законныя і ці засталіся яшчэ нязьнесеныя незаконныя, міністар не ўдакладніў.
20 красавіка Аляксандар Лукашэнка на «Лініі Сталіна» зрабіў шэраг выказваньняў пра Курапаты і знос крыжоў, у тым ліку заявіў, што «там яшчэ ня скончана». Таксама Лукашэнка заяўляў, што Сталін заслугоўвае адраджэньня ягонага імя.
Крыжалом у Курапатах. Што важна ведаць
У Курапатах 4 красавіка зьнесьлі 70 крыжоў, якія стаялі ўздоўж МКАД і пачалі ўсталёўваць плот. 13 красавіка зьнесьлі ўсе мэталічныя крыжы ўздоўж кальцавой дарогі.
Ці законна гэта? Суд па крыжах у Курапатах меў адбыцца пасьля 19 красавіка. Прэс-сакратарка кіраўніка Беларусі Натальля Эйсмант патлумачыла працы ў Курапатах распараджэньнем Аляксандра Лукашэнкі.
Як адрэагавалі людзі? Увечары 4 красавіка памаліцца ў Курапаты прыйшлі больш за 200 чалавек. Яны прайшлі крыжовым шляхам да месца, дзе зносілі крыжы. Цягам красавіка за Курапаты моляцца ў розных гарадах і мястэчках Беларусі.
Малітва за Беларусь на крыжовым шляху. ФОТАГАЛЕРЭЯ
Рэакцыю палітыкаў, грамадзкіх актывістаў і публічных асоб можна пачытаць тут.
Што такое Курапаты?
Курапаты – лясны масіў на поўначы Менску, дзе ў 1937–1941 гадах супрацоўнікі НКВД расстрэльвалі людзей.
Пра масавыя расстрэлы ў Курапатах шырока стала вядома ў 1988 годзе пасьля выхаду артыкула Зянона Пазьняка і Яўгена Шмыгалёва «Курапаты – дарога сьмерці».
Колькі там забілі? Гэта невядома дакладна — архівы НВКД і КГБ не раскрытыя, ды й магчыма, што нават у іх няма поўнага сьпісу расстраляных за час рэпрэсіяў.
Паводле розных падлікаў, карнікі НКВД расстралялі ў Курапатах з 1937 па 1941 гады ад 30 тысяч (першае сьледзтва, што вяла пракуратура БССР) да 250 тысяч чалавек.
Ці не нацысты гэта забівалі? Не, бальшавікі.
Аляксандар Лукашэнка заяўляў у 2015 годзе, нібы яшчэ не вядома дакладна, хто забіваў у Курапатах — бальшавікі ці нацысты. Пасьля выкрыцьця Курапатаў розныя групы спрабавалі знайсьці ў іх «нямецкі сьлед», але раз за разам гэта абвяргалі сьледчыя.
